اقتوبە وبلىسىندا العاش رەت تۇيەقۇس وسىرىلمەكشى

استانا. قازاقپارات - قوبدا اۋدانى ءاليا اۋىلىنىڭ تۇرعىنى وبلىستا ءبىرىنشى بولىپ تۇيەقۇس ءوسىرۋدى قولعا الادى، دەپ جازادى وبلىستىق گازەت.

«تۇيەقۇستىڭ بالاپاندارىن رەسەيدىڭ سامارا قالاسىنان الۋدى جوسپارلاپ وتىرمىز. بىلتىردان بەرى سامارا قالاسىنداعى تۇيەقۇس فەرماسىندا بىرنەشە رەت بولىپ، ونداعى فەرمەرلەردەن بۇل قۇستى كۇتىپ-باپتاۋدىڭ، ءوسىرۋدىڭ قىر-سىرىن بىلدىك. بيىل مامىر ايىنىڭ سوڭىندا تۇيەقۇستىڭ ءبىر ايلىق بالاپاندارىن اۋىلعا الىپ كەلەمىز»، - دەيدى سايلاۋ ماتايەۆ.

ونىڭ ايتۋىنشا، تۇيەقۇس كۇتىمدى، قامقورلىقتى ونشا قاجەت ەتپەيدى. تۇيەقۇستار ءۇشىن اشىق الاڭقايدا، تابيعات اياسىندا جۇرگەن پايدالى. اۋا رايى جاۋىن-شاشىندى، سۋىق بولعان كۇندەرى جىلى جەردە تۇرعاندى ۇناتادى. سوندىقتان ول جازدا اۋلاسىنا تۇيەقۇس تۇراتىن قورا سالۋدى جوسپارلاپ وتىر.

«اۋەلى كليمات ەرەكشەلىگىنە ءمان بەردىم. ءسويتىپ، رەسەيدىڭ اۋا رايى، اسىرەسە قىسقى كليماتى بىزدىكىنە ۇقساس كەلەتىنىنە كوز جەتكىزدىم. تۇيەقۇستار 30-35 گرادۋس ايازعا شىدايدى. سوندىقتان بۇل قۇستى وسىرۋدە اقتوبەنىڭ ايازى بوگەت بولا المايدى»، - دەيدى سايلاۋ.

سايلاۋ ماتايەۆ بيىل «جۇمىسپەن قامتۋ-2020» مەملەكەتتىك باعدارلاماسى ارقىلى تۇيەقۇس ءوسىرۋ ءۇشىن 1,7 ميلليون تەڭگە كولەمىندە نەسيە الدى.

سامارالىق فەرمەرلەر تۇيەقۇستىڭ ءبىر بالاپانىن 56 مىڭ تەڭگەگە باعالاپ وتىر. ازىرگە 20 بالاپان الۋ جوسپارلانعان. تۇيەقۇستىڭ بالاپانىن ەركەك-ۇرعاشىسىن كىشكەنتايىندا اجىراتۋ مۇمكىن ەمەس. وسە كەلە، ياعني 6-8 ايلىعىندا عانا ولاردى اجىراتۋعا بولادى. سوندىقتان دا بالاپاندى نەعۇرلىم كوبىرەك الۋ كەرەك ەكەن.

«تۇيەقۇس جەيتىن ازىقتىڭ ءبىرى - ورامجاپىراق. دەگەنمەن بۇل قۇسقا ورامجاپىراقتىڭ تارتىلعان ءتۇرىن ازىرلەۋ كەرەك. ويتكەنى تۇيەقۇستا ءتىس بولمايدى. سوسىن ۋاقىتىندا سۋارىپ وتىرسا، باسقا قيىندىعى جوق. ەگەر جوڭىشقا بولماسا، ءشوپتى كوكتەي ورىپ، قىسقا ساقتاۋ كەرەك. ءشوپتى ىلعالداي ساقتاۋعا بولمايدى. قازىر سامارا قالاسىنداعى فەرمادا تۇيەقۇستىڭ گوللانديالىق جانە افريكالىق تۇرلەرى ءوسىرىلىپ جاتىر. ءتۇرى مەن تۇسىندە وزگەشەلىك ايقىن بايقالادى. دەگەنمەن كوپشىلىگى گوللانديالىق ءتۇرىن وسىرۋگە اۋەس. اقتوبەگە افريكالىق ءتۇرىن اكەلۋدى ويلاستىرىپ وتىرمىن»، - دەيدى سايلاۋ.

ازىرگە تۇيەقۇستى ءوسىرىپ، سانىن كوبەيتۋدى عانا ماقسات ەتىپ وتىرعان سايلاۋ بۇل قۇستىڭ پايداسى شاش ەتەكتەن ەكەنىن ايتادى. تەرىسى، تۇياعى، تۇمسىعى، ەتى، جۇمىرتقاسى - ءبارى كادەگە جارايدى. ول مالعا قاراعاندا تەز وسەدى ءارى تەز كوبەيەدى.