قازاقستاندا تۋبەركۋلەزگە قارسى جاڭا ءدارى ەنگىزىلدى
بۇل تۋرالى بۇگىن الماتىدا تۋبەركۋلەز ماسەلەلەرى ۇلتتىق ورتالىعىندا وتكەن باسپا ءسوز ءماسليحاتى بارىسىندا وسى ورتالىقتىڭ ديرەكتورى، مەديتسينا عىلىمدارىنىڭ دوكتورى، پروفەسسور جۇماعالي يسمايلوۆ مالىمدەدى.
ونىڭ ايتۋىنشا، بەداكۆيلين - الەمدە 1960 -جىلدان بەرى تۇڭعىش رەت ەمدەۋگە رۇقسات ەتىلگەن جاڭا پرەپارات.
«بۇل، ءدارى-دارمەككە ءتوزىمدى تۋبەركۋلەز فورمالارىن ەمدەۋدە سوڭعى 40 جىل ىشىندەگى ەڭ ەلەۋلى جەتىستىك دەۋگە بولادى. ا ق ش عالىمدارى ويلاپ تاپقان بەداكۆيلين ءدارىسى 2012 -جىلى تۇڭعىش رەت ا ق ش- تا جەدەلدەتىلگەن تۇردە قولدانىلا باستادى. ءوزىنىڭ تيىمدىلىگىن كورسەتتى. سودان، دۇنيەجۇزىلىك دەنساۋلىق ساقتاۋ ۇيىمى ونى بۇكىل الەم بويىنشا تۋبەركۋلەزدىڭ ءدارى- دارمەككە ءتوزىمدى فورمالارىن ەمدەۋگە قولدانۋعا رۇقسات ەتتى. ا ق ش حالىقارالىق دامۋ اگەنتتىگىنىڭ (USAID) باستاماسىمەن كوپتەگەن ەلدەر بۇل دارىگە تەگىن قول جەتكىزىپ وتىر. بيىل سول ەلدەرگە بەداكۆيليننىڭ 30 مىڭ ەمدىك كۋرسقا شاقتالعان مولشەرى تاراتىلادى. ال قازاقستان العاشقىلاردىڭ ءبىرى بولىپ، وسى پرەپاراتتى ەنگىزۋدە. ەندى كوپتەگەن ءدارى-دارمەككە ءتوزىمدى كەلەتىن تۋبەركۋلەزدەن زارداپ شەگەتىن 500 قازاقستاندىق ناۋقاس تولىعىمەن ايىعىپ كەتكەنشە، ياعني 6 اي بويى وسى بەداكۆيلين جانە سوعان قوسىمشا پرەپاراتتار ارقىلى كەشەندى ەم قابىلدايدى»، - دەدى ج. يسمايلوۆ.
سونىمەن قاتار، ول قازاقستاندا قازىرگى تاڭدا تۋبەركۋلەزگە قاتىستى جاعدايدىڭ ەداۋىر جاقسارعاندىعىن جەتكىزدى.
«قازاقستان ورتالىق ازيا وڭىرىندە تۋبەركۋلەز اۋرۋىن انىقتاۋ جانە ونى ءتيىمدى ەمدەۋ بويىنشا كوش باسىندا كەلەدى. قازاقستاندا تۋبەركۋلەزگە قارسى مەملەكەتتىك باعدارلاما قابىلدانعان. ورتالىق ازيا وڭىرىندە قازاقستاندا عانا ناۋقاستار رەسپۋبليكالىق بيۋدجەت ەسەبىنەن تەگىن ەمدەلەدى. ەلىمىزدە سوڭعى 10 جىل ىشىندە تۋبەركۋلەزبەن اۋرۋ كورسەتكىشى ەكى ەسەگە تومەندەدى. جىل سايىن رەسپۋبليكالىق بيۋدجەتتەن تۋبەرۋلەزگە قارسى قىزمەتكە 35 ميلليارد تەڭگە جۇمسالادى»، - دەدى ج. يسمايلوۆ.
ايتا كەتەلىك، بەداكۆيلين پرەپاراتىن ا ق ش- تىڭ «دجونسون جانە دجونسون» كومپانياسىنىڭ ەنشىلىس كومپانياسى «يانسسەن فارماسيۋتيكالز» كاسىپورنى ويلاپ تاپقان.
ال، قازاقستانعا قازىرگى تاڭدا بەداكۆيليننىڭ 150 ناۋقاستى ەمدەۋگە ارنالعان مولشەرى جەتكىزىلگەن. الماتىداعى تۋبەركۋلەز ماسەلەلەرى ۇلتتىق ورتالىعىندا، استانا قالاسىندا جانە كوكشەتاۋ تۋبەركۋلەزگە قارسى ديسپانسەرىندە جالپى سانى 54 ناۋقاس وسى ءدارى بويىنشا ەم قابىلداۋدى باستاعان.