مادەنيەت ءمينيسترى ميۋزيكل جانرىن جانداندىرماق

استانا. قازاقپارات - مادەنيەت جانە سپورت ءمينيسترى الداعى ۋاقىتتا ميۋزيكل جانرىن جانداندىرۋدى قولعا الاتىن بولادى.

بۇل تۋرالى بۇگىن پارلامەنت سەناتىنداعى كەزدەسۋ بارىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.

ءسوز اراسىندا مينيستر اعىمداعى جىلدان باستاپ «ورتالىق كونسەرت زالى» ۆەدومستۆونىڭ قاراماعىنا وتكەنىن العا تارتىپ، الداعى ۋاقىتتا «قازاق كونسەرت» برەندىن استاناعا كوشىرۋ تۋرالى شەشىم قابىلدانعانىن جەتكىزدى.

«ءبىزدىڭ الداعى ۋاقىتتا اتقاراتىن باستى ماقساتىمىزدىڭ ءبىرى - جانرلاردى اشۋ، دامىتۋ. سونىڭ ىشىندە قازاق كورەرمەندەرىنە تاڭسىق بولىپ كەلەتىن ميۋزيكل جانرىنا جان ءبىتىرۋ كەرەك. ويتكەنى، بىزدە جاڭا تەاترلار بار، فولكلورلىق جانرلار بار. دەگەنمەن، قازاقستاندا ميۋزيكل سەكىلدى جانر جوق. وسى باعىتتا قازىر «ميۋزيكل استانا» ۇجىمىن قۇرۋدى قولعا الۋدامىز»، - دەدى مينيستر ا. مۇحامەدي ۇلى.
ايتا كەتەيىك، ميۋزيكل (اعىلش. Musical) - ەسترادالىق، حورەوگرافيالىق، درامالىق، وپەرالىق، ت. ب. سان ءتۇرلى ونەردىڭ اسەرلى ەرەكشەلىكتەرىن بىرىكتىرىپ كورسەتەتىن مۋزىكالىق- ساحنالىق قويىلىم. بۇل جانردىڭ تەك كومەديالىق قانا ەمەس، درامالىق سيۋجەتى دە بولادى. ميۋزيكل جانر رەتىندە 1920 - 30 -جىلدارى ا ق ش- تا پايدا بولدى. 1940 - 60 -جىلدارى ا ق ش- تا ەرەكشە دامىپ، 60 -جىلداردان باستاپ باسقا ەلدەردە كەڭ تارالا باستادى. قازىرگى ۋاقىتتا ميۋزيكل مۋزىكالىق تەاترلارى روك- مۋزىكا، ءان- ءبي جانرلارى ەلەمەنتتەرىن يگەرە وتىرىپ دامۋدا.

اۆتور: بەيسەن سۇلتان ۇلى