ەكسكليۋزيۆ: قازاق قىزىنىڭ جاھاندىق كاسىپكەرلەر ءسامميتىن باعىندىرۋى ءۇشىن داۋىس بەرۋ جالعاسىپ جاتىر

استانا. قازاقپارات - قوستاناي قالاسىندا تۇراتىن ءسابينا يسمايلوۆا كاسىپكەرلىكتى دامىتۋ ماقساتىندا جىل سايىن ۇيىمداستىرىلاتىن حالىقارالىق عىلىمي-تەحنيكالىق كونكۋرستىڭ جارتىلاي فينالىنا ءوتتى.

جارتىلاي فينالدا جەڭۋ ءۇشىن سابيناعا gistnetwork.org سايتىندا داۋىس بەرۋ كەرەك. داۋىس بەرۋ 1- مامىرعا دەيىن جالعاسادى. ەگەر ءسابينا جارتىلاي فينالدا جەڭىسكە جەتسە، ول «كرەمني اڭعارىندا» وتەتىن GES-2016، ياعني، جاھاندىق كاسىپكەرلىك سامميتىندە قازاقستاننىڭ نامىسىن قورعايدى.

قازاقپارات ءتىلشىسى ءسابينا يسمايلوۆانىڭ وزىمەن ونىڭ يدەياسى تۋرالى اڭگىلەمەسكەن ەدى. ايتا كەتەيىك، ءسابينا جاھاندىق كاسىپكەرلەر سامميتىندە مۇمكىندىگى شەكتەۋلى ازاماتتاردى قاشىقتىقتان وقىتۋ جوباسىن ۇسىنباق.

كونكۋرسقا قاتىسۋ ءۇشىن بيىل الەمنىڭ 170 ەلىنەن مىڭنان اسا ادام ءوتىنىش بەرگەن ەكەن. جارتىلاي فينالعا مىڭ ادامنان بار جورعى 120 ادام ءوتىپ وتىر. ءسابينا يسمايلوۆانىڭ ۇسىنعان جوباسى مۇمكىندىگى شەكتەۋلى ازاماتتارعا الەمنىڭ كەز كەلگەن ەلىندە ءبىلىم الۋعا مۇمكىندىك بەرەدى.

«بۇل پلاتفورما قاشىقتىقتان ءبىلىم بەرۋگە ارنالعان. پلاتفورمانىڭ فۋنكتسياسى وتە كوپ. مىسالى، ءماتىننىڭ ساپاسىن جاقسارتۋ، داۋىسپەن باسقارۋ، رەپەتيتورلاردىڭ ۆيرتۋالدى بولمەسى سياقتى جاڭا قىرلارى كوپ»، - دەيدى ءسابينا يسمايلوۆا.

ونىڭ ايتۋىنشا، كونكۋرسقا قاتىساتىن جوبالار ەكى تۇرگە بولىنگەن. ستارتاپ جوبالار مەن جاڭا يدەيالاردىڭ جوبالارى. 26 جاستاعى قازاق قىزىنىڭ جوباسىنىڭ ءونىمى ءالى دايىن بولماعاندىقتان، «يدەيالار» قاتارىنا كىرەدى. قازىر ءسابينا مەن ونىڭ دوسى سايتتى ازىرلەپ جاتىر.

«جالپى، بۇل يدەيا بۇرىننان ويىمدا جۇرگەن ەدى. ءبىراق، ونى ءىس جۇزىندە 2015-جىلى جۇزەگە اسىرا باستادىم. «بولاشاق» باعدارلاماسى بويىنشا ا ق ش- تا ءبىلىم العان ۋنيۆەرسيتەتتىڭ بازاسى - قۇلاعى ناشار ەستيتىن ادامدار مەن ساڭىراۋ جاندارعا ارنالعان مىقتى بازانىڭ ءبىرى. ۋنيۆەرسيتەتتى سونداي-اق مۇمكىندىگى شەكتەۋلى ادامدار دا ءبىلىم الاتىن. ءبىز ءبىر پارتادا وتىرىپ وقىدىق. قازاقستاندا مۇندايدى كورمەگەن مەن ءۇشىن وتە قىزىق ەدى. بىزدەگى ۋنيۆەرسيتەتتەر مۇمكىندىگى شەكتەۋلى ازاماتتاردى وقىتا المايدى. سوندىقتان، وسىنداي پلاتفورما جاساۋدى ويعا الدىم»، - دەيدى ول.

ءسابينا قازاقستاندا نەشە مۇگەدەك ادام بار ەكەنىن جانە ولاردى وقىتۋ ءۇشىن قانداي تەحنولوگيالار كەرەك ەكەنىن زەرتتەگەن. ەگەر دە ءسابينا يسمايلوۆانىڭ جوباسى فينالعا وتسە، ول قازاقستان اتىنان ا ق ش- تاعى كرەمني اڭعارىندا وتەتىن جاھاندىق كاسىپكەرلەر سامميتىنە قاتىسادى. فينالعا 30 جوبا وتەدى جانە فينالعا وتكەن جاس كاسىپكەرلەردىڭ بارلىعىنا كرەمني اڭعارىنىڭ وكىلدەرى تالىمگەر بولادى. كونكۋرستىڭ جۇلدە قورى - 70 مىڭ دوللار.

اۆتور: كەنجەكەي توقتامۇرات قىزى