ماسكەۋدە قازاق جانە قۇمىق پوەزيا كەشى ءوتتى

  استانا. قازاقپارات - ماسكەۋدە «براتەيەۆو مادەنيەت ۇيىندە» قازاق جانە قۇمىق پوەزيا كەشى ءوتتى. تۇركى تىلدەس حالىقتىڭ باس قوسۋى حالىق اراسىنداعى دوستاستىقتى نىعايتۋدى، ولاردىڭ مادەنيەتىن تانىتۋدى ماقسات ەتتى.

كەشتىڭ شىمىلدىعىن قۇمىق قىزدارى حالىق بيىمەن اشىپ، كەسەمەن بيلەپ ەلدى تاڭعالدىردى.

قوس حالىقتىڭ مۇراسىندا ساقتالعان اقىنداردىڭ جىرىنان نۇر توگىلىپ، تاريح بەتتەرى اشىلدى. ءتۇرلى ۇلت وكىلدەرى قازاق- قۇمىق تىلدەرىندە ونەر كورسەتتى، ءبىرى «مەن قازاقپىن» دەپ جىرلاسا، ءبىرى «الديلەپ ايالاپ» دەپ انا تۋرالى ءان شىرقادى.

ⅩⅨ عاسىردا حالىقتىڭ مۇڭىن جىرلاپ، ءحالىن جەتكىزگەن بىردەن- ءبىر قازاق اقىنى سۇلتانماحمۇت تورايعىروۆتىڭ اتى اتالىپ، شىعارماشىلىعى تانىستىرىلدى. تەك اقىننىڭ عانا ءتىلى جالپى حالىققا وتەدى، حانعا دا، قارا حالىققا دا ءسوز ايتا الادى. مۇنداي قاسيەتتى قازاقتىڭ سىرشىل اقىنى ماعجان جۇمابايەۆتىڭ بويىنان بايقاۋعا بولاتىندىعى ايتىلدى. ونىڭ «مەن جاستارعا سەنەمىن» ولەڭىن رەسەي كەدەن اكادەمياسىندا وقيتىن قازاق قىزى احمەتجانوۆا التىناي وقىپ بەردى.

 دومبىرا شاناعىنان كۇمبىرلى كۇي توگىلدى. «شابىت» دومبىرا ءانسامبلى قازاقتىڭ ءتول ونەرىن رەسەي ساحناسىندا جانداندىرىپ كەلەدى. كەزەكپەن ليريكالىق ولەڭدەر وقىلدى. بۇل جىرلاردىڭ العاشقىسى -  حانتاڭىرىنىڭ مۇزبالاعى اتانعان ءمۇقاعاليدىڭ ليريكالىق ولەڭدەرىنەن باستالدى. قازاق جاستارى كەنجەحان مادينا «سەن مىنا جانارىمنىڭ ىشىندەسىڭ» دەپ جىرلاسا، ءبىرى جاقسىمبەتوۆ ەركەبۇلان «شەشە، سەن باقىتتىسىڭ» دەپ اناسىنا دەگەن ساعىنىشىن جەتكىزدى.

كەشتە رۋحتى ولەڭدەر دە وقىلدى. مۇحتار شاحانوۆتىڭ «ءتورت انا» ولەڭىن قابەيەۆا جۇماگۇل ەسىمدى قازاق قىزى وقىسا، «جىگەرلەندىرۋ» ولەڭىمەن كەنجەتاي راۋان كورەرمەندەردى ءبىر جىگەرلەندىرىپ الدى. كەشتە ليريكانىڭ ءتۇرلى باعىتى كورىنىس تاپتى دەسەك، ارتىق ەتپەيدى.

بۇل كەشتە ولەڭ دە وقىلدى، ءان دە شىرقالدى، كۇي دە توگىلدى، ءبي دە بيلەندى. ءتىپتى، ساحنالىق كورىنىس تە قويىلدى. كەشتە جينالعان حالىق قازاق ادەبيەتىنىڭ كلاسسيكالىق تۋىندىسى «اباي جولى» رومانىنان قويىلىم دا تاماشالادى. ابايدىڭ ەۆگەني ونەگيندى ولەڭمەن ورىلگەن روماننان تانىعانى، تاتيانانىڭ ءانى ساحنالاندى. بۇل كورىنىس كورەرمەندەرگە «عاشىقتىڭ ءتىلى - ءتىلسىز ءتىل» دەگەن دانالى ويدى جەتكىزدى.

كەش شاراعا ارناپ قازاق جانە قۇمىق تىلىندە جازىلعان انمەن اياقتالدى. كەش قوناقتارى العىستارىن جاۋدىرىپ، حالىقتار اراسىنداعى دوستىقتىڭ ارتا بەرۋىنە تىلەكتەستىكتەرىن ءبىلدىردى.

كەشتىڭ نەگىزگى ۇيىمداستىرۋشىلارى: «مۇراگەر» ماسكەۋ قازاق مادەنيەتى قوعامى مەن «Qumuqlar» قۇمىق مادەنيەتى ۇيىمى.

ەندى سۋرەتتەر سويلەسىن:

 

 

 

 

 

 

 

 

 

 

 

 

 
massaget.kz