قىتايدان ورالعان قانداسىمىز - ءماسليحات دەپۋتاتى بولدى

استانا . قازاقپارات - قىتايدان ورالعان قانداسىمىز اقمولا وبلىسىندا اۋداندىق ءماسليحاتقا دەپۋتات بولىپ سايلاندى، - دەپ حابارلايدى «قامشى» پورتالى.

20 - ناۋرىزداعى سايلاۋدا قانداسىمىز ەرعالي اسقار ۇلى 56 پايىز داۋىس جيناپ اقمولا وبلىسى ەرەيمەنتاۋ اۋدانى ءماسليحاتىنىڭ دەپۋتاتى اتانعان ەدى. ارعى بەتتەگى اعايىنعا ۇلگى بولسىن دەگەن نيەتپەن وسى جاڭالىقتى سۇيىنشىلەپ جاريالاپ وتىرمىز.

 ەرعالي 1989 -جىلى 1 - قاراشادا قىتاي حالىق رەسپۋبليكاسى التاي ايماعى شىڭگىل اۋدانىندا دۇنيەگە كەلگەن. سول جەردەگى باستاۋىش جانە نەگىزگى مەكتەپتى ءتامامداعان. 2005 -جىلى وتباسىمەن بىرگە قازاقستانعا كوشىپ كەلگەن. 2005-2007 -جىلدارى ەرەيمەنتاۋ اۋدانى ولجاباي باتىر اۋىلى بلاگودات ورتا مەكتەبىن اياقتاعان. 2008-2010 -جىلدارى استانا قالاسى «قارجى اكادەمياسى» كوللەدجىن تەحنيك باعدارلاماشى ماماندىعى بويىنشا ۇزدىك ديپلوممەن بىتىرگەن.

 2011-2012 -جىلدارى ەرەيمەنتاۋ اۋدانى جۇمىسپەن قامتۋ ورتالىعىندا تەحنيك- باعدارلاماشى لاۋىزىمىندا بولعان. 2012-جىلدان بەرى ولجاباي باتىر اۋىلىنىڭ ورتا مەكتەبىندە ينفورماتيكا ءپانىنىڭ مۇعالىمى. قازىرگى تاڭدا پاۆلودار مەملەكەتتىك پەداگويكالىق ينستيتۋتىنىڭ ينفورمايتكا ءپانى مۇعالىمى ماماندىعى بويىنشا سوڭعى كۋرستا سىرتتاي بولىمدە وقۋىن جالعاستىرۋدا. قازاق ورىس تىلدەرىن مەڭگەرگەن. ۇيلەنگەن. ءبىر قىزدىڭ اكەسى.

 ءار ءتۇرلى قوعامدىق شارالارعا بەلسەنە قاتىسىپ جان- جاقتى قىرمەن تانىلىپ حالىق قالاۋلىسى اتانعان ەرعالي  حالىقتىڭ سەنىمىن اقتايدى دەپ سەنەمىز. الداعى جۇمىس ساپارىڭا ساتتىلىك، ىستەرىڭە ونىمدىلىك تىلەيمىز.

 ەردوس ءجانابىل ۇلى