بىشكەك ورتالىعىندا بەلگىسىز بىرەۋلەر كولىككە وق جاۋدىردى
07:12, 11 - ءساۋىر 2016
استانا. قازاقپارات - بىشكەك ورتالىعىنداعى يسايەۆ كوشەسى مەن ءچۇي داڭعىلىنىڭ قيىلىسىندا بەلگىسىز بىرەۋلەر كولىككە قاراتا وق اتتى. بۇل تۋرالى كيرتاگ اگەنتتىگى حابارلادى.
وقيعانىڭ كۋاگەرلەرى ەكى رەت وق اتىلعانىن ەستىگەن. قالالىق ءى ءى ب- دا وقيعا تۋرالى تولىققاندى اقپارات بەرمەدى.
«وندا اتىس-شابىس بولعان جوق. ءجۇرىپ بارا جاتقان كولىككە قاراي وق اتىلدى. وق اتقاندار قارۋلارىن تاستاپ، وقيعا ورنىنان ءىزىن جاسىردى. الدىن الا شامالاۋ بويىنشا، ەشكىم زارداپ شەككەن جوق. ناقتى اقپارات كەيىنىرەك بەرىلەدى»، - دەپ حابارلادى بىشكەك قالالىق ءى ءى ب باسپا ءسوز قىزمەتىنىڭ باستىعى ولجوباي قازابايەۆ.
كۋاگەرلەردىڭ ايتۋىنشا، بۇعان دەيىن قورشاۋعا الىنعان وقيعا ورنى اشىق، پوليتسيا جاساقتارى كەتىپ قالدى.
الەۋمەتتىك جەلىلەردە «بۇل رەسەيلىك بيزنەسمەنگە قاستاندىق جاساۋ ارەكەتى بولۋى مۇمكىن» دەگەن تەكسەرىلمەگەن اقپارات پايدا بولدى. الايدا بۇعان ەشقانداي رەسمي دالەل جوق.