قىتاي كومپانياسى قازاقستاندا وسىمدىك مايلارىن شىعاراتىن زاۋىت سالماق

استانا. قازاقپارات - كەشە سولتۇستىك قازاقستان وبلىسى تايىنشا قالاسىندا تايىنشا اۋدانى اۋىل شارۋاشىلىعى تاۋارىن وندىرۋشىلەرى مەن قىتايدىڭ «ايتسزيۋ» ترانس ۇلتتىق كومپانياسى وكىلدەرىنىڭ كەزدەسۋى ءوتتى.

شارا اۋىل شارۋاشىلىعى سالاسىنا ستراتەگيالىق ينۆەستورلار تارتۋ جونىندەگى ەلباسى جۇكتەگەن مىندەتتى ورىنداۋ ماقساتىندا ءوتىپ، وندا مايلى داقىلدار ءوندىرۋ جانە قايتا وڭدەۋ كووپەراتيۆىن قۇرۋ تۋرالى ءسوز بولدى. بۇل تۋرالى اۋىل شارۋاشىلىعى مينيسترلىگىنىڭ باسپا ءسوز قىزمەتىنەن حابارلاندى.

كەزدەسۋگە ق ر اۋىل شارۋاشىلىعى مينيسترلىگىنىڭ، وبلىس اكىمدىگىنىڭ، «قازاگرو» ۇ ب ح» ا ق جانە «اتامەكەن» ۇ ك پ وكىلدەرى قاتىستى. مينيسترلىك مالىمەتىنە قاراعاندا، اتالعان باستاما مايلى داقىلداردىڭ ەگىستىك القابىن جانە وسىمدىك مايى ءوندىرىسىن ۇلعايتۋعا مۇمكىندىك بەرەدى.

«قىتايدىڭ «ايتسزيۋ» ترانس ۇلتتىق كومپانياسى سولتۇستىك قازاقستان وبلىسىندا وسىمدىك مايلارىن ءوندىرۋ زاۋىتىن سالۋدى جوسپارلاۋدا. جوبانىڭ باعدارلى قۇنى 58 ميلليون دوللاردى قۇرايدى. زاۋىت جىلىنا 80 مىڭ توننا وسىمدىك مايىن شىعارۋدى جوسپارلاپ وتىر»، - دەلىنگەن باسپا ءسوز بايانىندا.

ەسكە سالساق، اعىمداعى ناۋرىزدا قىتايعا قازاقستاننان 2 مىڭ توننا وسىمدىك مايى ەكسپورتتالعان بولاتىن. كەلەشەكتە ءار داقىلدىڭ جىل سايىنعى ساتىپ الۋ كولەمىن 200 مىڭ تونناعا دەيىن ۇلعايتۋ جوسپارلانۋدا.

اۆتور: قانات مامەتقازى ۇلى