تويشىل قازاققا اسابا مەن ءارتىستى تاۋىپ بەرەتىن «تويدرايۆەر» قوسىمشاسى جاسالدى
«بۇل جوبانى دۋمان ەسىمدى سەرىكتەسىممەن بىرگە جاساپ شىعاردىق. جالپى، مەنىڭ ويىمشا، توي يەسى اقشا تولەي وتىرىپ، نەگە ارتىستەر مەن ۇيىمداستىرۋشىلاردى ءوزى ىزدەۋى كەرەك؟ كەرىسىنشە، ارتىستەر مەن تامادالار ونى ىزدەۋى كەرەك.
ياعني، توي يەسى قولدا بار اقشاسىن كورسەتسە جەتكىلىكتى ەمەس پە!؟ مىنە، ءبىز ويلاپ تاپقان موبيلدىك قوسىمشا وسىعان مۇمكىندىك بەرەدى. بۇل موبيلدى قوسىمشانى توي يەسى ۇيالى تەلەفونىنا كوشىرىپ الىپ، تىركەلەدى. قوسىمشانىڭ ەكى فۋنكسياسى بار: بىرىنشىدەن، تىركەلىپ، قاي قالادا ەكەنىن، قانداي مەرەكە ەكەنىن جازىپ، ءوز باعاسىن قويادى. ونىڭ جازباسى push ارقىلى ToiDriver دا تىركەلىپ، ءوزىنىڭ قىزمەتتەرىن ۇسىنعان ارتىستەر مەن تامادالارعا تارايدى. وسىلايشا، ءارتىس نە ۇيىمداستىرۋشى تاپسىرىس بەرۋشىگە ءوزى حابارلاسادى. ەكىنشى فۋنكسياسى - توي يەسى باعدارلاماعا كىرىپ، قاجەتتى پارامەترلەردى جازسا، جەتكىلىكتى. ەشقانداي دەلدالسىز سول كۇنى كەستەسى بوس ءارتىس نە تامادانىڭ بايلانىس تەلەفوندارى، انكەتاسى شىعادى. تاپسىرىس بەرۋشى اراسىنان بىرەۋىن تاڭداپ مەرەكەسىن وتكىزە بەرەدى»، - دەيدى جوبا اۆتورىنىڭ بىرى جاندوس.
بۇل باعدارلامانىڭ سايتى دا ءبىر-ەكى اپتادا جۇمىسىن باستايدى ەكەن. وسىلايشا، ToiDriver - كەز كەلگەن مەرەكەلىك شارانى دەلدالسىز ۇيىمداستىرۋعا كومەكتەسەتىن ت م د ەلدەرىنىڭ اراسىنداعى ەڭ العاشقى موبيلدى قوسىمشا بولماق.
جاندوستىڭ ايتۋىنشا، جوبا «بولاشاق» باعدارلاماسىمەن وقىعان تۇلەكتەردىڭ جەمىسى جانە بۇل ۇزاق مەرزىمدى بيزنەس- جوبا. باعدارلامانى IOS جانە Android وپەراتسيالىق جۇيەلەرىنەن تەگىن كوشىرىپ الۋعا بولادى.
«باعدارلامانىڭ قىزمەتىن پايدالاناتىن تاپسىرىس بەرۋشىلەر، ياعني، كەز كەلگەن توي يەسى جازباسى ءۇشىن نەمەسە ءارتىستىڭ تەلەفونىن الۋ ءۇشىن مۇلدەم اقشا تولەمەيدى. ياعني، حالىق ءۇشىن ءبارى تەگىن. ال، باعدارلاماعا قىزمەتتەرىن ورنالاستىراتىن ارتىستەر ءۇشىن بىر جىلدان سوڭ اقى ەنگىزۋىمىز مۇمكىن، ونىڭ وزىندە 400-500 تەڭگە كولەمىندە. بولاشاقتا جالعان تاپسىرىس بەرۋشىلەر كوبەيىپ كەتسە، بالكىم 20-30 تەڭگە كولەمىندە مىندەتتى جارنا ەنگىزۋىمىز مۇمكىن»، - دەيدى جاندوس تۇرسىمبايەۆ.
وسىلايشا، ەندى تويشىل قازاق كەز كەلگەن تويىنا ءسان بەرەتىن اسابا، ءانشى، ءارتىستى، ءبيشى، فوتو- ۆيدەو وپەراتوردى، سيقىرشىلار مەن وزگە دە قىزمەت يەلەرىن ۇيىنەن شىقپاي-اق ءوزى قالاعان باعاعا تابا الادى.
اۆتور: كەنجەكەي توقتامۇرات قىزى