قايرات نۇرتاس رەسەي ساحناسىن باعىندىرماق

استانا. قازاقپارات - قايرات نۇرتاس كەلەسى جىلى كرەملدە جەكە ءان كەشىن وتكىزۋدى جوسپارلاپ وتىر. بۇل تۋرالى ءانشى «سالەم، قازاقستان» شوۋىندا جاريا ەتتى.

«اشىق ميكروفون» ايدارىندا تىڭدارماننىڭ ءتۇرلى سۇراقتارىنا جاۋاپ بەرگەن قايرات نۇرتاس الەمنىڭ ۇلكەن ساحنالارىندا ونەر كورسەتۋ تۋرالى ساۋالعا دا توقتالا كەتتى.

«ءار ونەر ادامىنىڭ ارمانى قازاق حالقىن، قازاق ەلىن باسقا ەلگە جاقسى جاعىنان كورسەتۋ. مىسالى يليا يلين، گەننادي گولوۆكين، ءبىز دە ءوز ەلىمىزدى انمەن تانىتقىمىز كەلەدى. بۇل - ءار ونەر ادامىنىڭ ارمانى. سوندىقتان اللا قالاسا، كەلەسى جىلى كرەملدە مەنىڭ ءوزىمنىڭ جەكە كەشىم وتەدى دەگەن ويىم بار. ءارى قاراي تاعى دا فرانسيا، امەريكا بولسىن، اللا قالاسا، بارا جاتارمىز»، - دەدى ءانشى.