شىمكەنتتىك ەمشى كوپشىلىكتىڭ كۇلكىسىن كەلتىردى
شىمكەنتتە ايەلدەردى قۇشاقتاپ ەمدەيتىن ەمشى كوپشىلىكتىڭ كۇلكىسىن كەلتىردى
داريعا ەسىمدى ايەل شىمكەنت قالاسىنداعى «كۇنشىعىس» مولتەكاۋدانىندا تۇراتىن ءبىر ەمشىگە ەمدەلىپ جۇرگەنىن ايتتى. الگى ادامنىڭ ەمدەۋ ءادىسى دە ەرەكشە ەكەن. ياعني ول الدىنا كەلگەن قىز- كەلىنشەكتەردى قۇشاقتاپ، ماسساج جاساپ ەمدەيتىن كورىنەدى.
«ەكىنشى قىزىمدى ومىرگە اكەلگەن سوڭ ءبىراز جىل «دەمالايىن» دەپ جاتىرىما «سپيرال» سالعىزعان ەدىم، - دەيدى داريعا. - سونىم بەكەر- اق بولعان ەكەن. قانشا جىل وتسە دە بالا كوتەرە الماي اۋرە- سارساڭعا ءتۇسىپ ءجۇرمىن. تاپقان- تايانعاننىڭ ءبارى ءدارى- دارمەككە، مەديتسينالىق تەكسەرىلۋگە كەتىپ جاتىر. ەش ەم قونار ەمەس. كورىنبەگەن دارىگەرىم، بارماعان ەمشىم قالمادى. قازىر ەكى ايەلدىڭ باسى قوسىلعان جەردەن ەمشى-ءتاۋىپ تۋرالى سۇرايتىن بولدىم. بىرەۋى بولماسا، ەكىنشىسىنەن ەم دارىپ، بالالى بولاتىن شىعارمىن دەگەن وي عوي مەنىكى.
سودان ءبىر كۇنى بولە اپكەم: «شىمكەنتتە داۋلەت دەگەن ەمىشى شىعىپتى، ول نەگىزىنەن تۇرمىسقا شىقپاي جۇرگەن قىزداردى، بالالى بولا الماي جۇرگەن ايەلدەردى قارايدى ەكەن. سول كىسىگە بارىپ كورسەڭشى»، - دەپ كەڭەس بەردى. «ءۇمىتسىز - شايتان» دەمەكشى، تانىسىم ايتقان ەمشىنى ءبىر كۇنى ىزدەپ باردىم.
«ۆوستوكتاعى» كوپقاباتتى ۇيلەردىڭ بىرىندە پاتەرى بار، ەم ىزدەپ كەلگەندەردى سوندا قارايدى ەكەن. مەن جەكسەنبى كۇنى بارعانمىن، دەمالىس بولعان سوڭ با، داۋلەت ەمشىگە كورىنەمىن دەگەن ايەلدەر كوپ بولدى. ءبىر-ەكەۋىن سوزگە تارتىپ، داۋلەت ەمشى تۋرالى سۇراستىرىپ ەدىم، شىنىندا دا جاقسى ەمدەيدى، اسىرەسە بالا كوتەرمەي جۇرگەن جاندارعا شيپا بار دەگەن جاۋاپ الدىم. ونى ەستىگەن سوڭ ءۇمىتىم ودان سايىن كۇشەيىپ، ەمشىنىڭ الدىنا كىرگەنشە اسىق بولدىم.
داۋلەت ەمشى دەگەندەرى جاسى 50 دەن اسقان، اققۇبا ءوڭدى، تولىق دەنەلى كىسى ەكەن. ءۇش بولمەلى پاتەردە وزىنەن باسقا تاعى ءبىر ايەل بار. شاماسى كومەكشىسى-اۋ، ويتكەنى ەم بارىسىندا سۋ اكەلىپ، ادامداردى كىرگىزىپ-شىعارىپ تۇرعانىن بايقادىم.
سونىمەن نە كەرەك، داۋلەت ەمشى مەنى الدىنا وتىرعىزىپ قويىپ، تامىرىمدى ۇستادى. سودان بۇيرەگىمنىڭ، باسىمنىڭ اۋىراتىنىن، جاتىرىمنىڭ سۋىقتاعانىن ايتتى. راسىندا دا بۇيرەك پەن باس اۋرۋى مەنى ءجيى مازالايتىن. ونىڭ ايتقاندارى كوڭىلىمە قونعان سوڭ ىشتەي ناعىز ەمشى ەكەن عوي، كەسەلىمدى ءدوپ باسىپ ايتىپ جاتىر دەگەن سەنىم پايدا بولدى.
«قاراعىم، قاتتى سۋىقتاپسىڭ، بار گاپ بۇيرەك پەن جاتىردا بوپ تۇر. ەمدەۋ كەرەك، نيچەگو، ءبارى جاقسى بولادى، ءالى-اق قوشقارداي ۇل تاباسىڭ. ءبىراق مەنىڭ قوياتىن شارتىم بار. سەنى 7 كۇن ەمدەيمىن، وسى ارالىقتا ەشقانداي ءدارى-دارمەك قابىلداماۋىڭ كەرەك. كۇيەۋىڭمەن جاقىنداسپايسىڭ، دارىگەرلەرگە قارالمايسىڭ. ايتپەسە ەكەۋمىزدىڭ بۇكىل ەمىمىز زايا كەتەدى. وسىعان كەلىسسەڭ، دەم سالۋدى باستايىن»، - دەدى. ماعان قايتكەن كۇندە دە بالالى بولۋ كەرەك، ەمدەلسەم ەمدەلەيىن دەدىم دە، دەم سالۋعا رۇقسات بەردىم.
وسىدان كەيىنگى ەمشىنىڭ ارەكەتى مۇلدەم كۇلكىلى بولدى. ەڭگەزەردەي ادام الدىما جاقىنداپ وتىردى دا: «بۇيرەكتى ەمدەۋىم ءۇشىن ءسىزدى قاپسىرا قۇشاقتاپ، قولدارىمدى ەكى بۇيرەگىڭىزگە تيگىزۋىم كەرەك. سوندا عانا مەنىڭ بويىمداعى «بيوتوك» دەنەڭىزگە تارايدى، بويىڭىز جىلىپ، راحات كۇي كەشەسىز»، - دەدى.
قانشاما ءتاۋىپتىڭ الدىنان ءوتىپ، نەبىر قىزىقتارعا كۋا بولعانمىن عوي، ءبىراق داۋلەت ەمشىنىڭ قۇشاقتاپ دەم سالاتىنىن ءبىرىنشى رەت كورىپ، ءبىرتۇرلى بولدىم. سونىمەن نە كەرەك، داۋلەت ەمشى مەنى قۇشاقتاپ بىردەڭەلەردى وقىدى. سوسىن جاتقىزىپ قويىپ، جىلقىنىڭ مايىمەن كىندىگىمنىڭ اينالاسىنا ماسساج ىستەدى».
داريعا داۋلەت ەمشىگە 7 كۇن بارىپ، ەمىن قابىلداپتى. ەمشى كۇن سايىن الگىندەي ءادىس قولدانعان. ايەلدى قىسىپ قۇشاقتاپ الادى دا، بىردەڭەلەردى كۇبىرلەپ وقيدى. ودان سوڭ مايمەن دەنەسىن ۋقالاپ شىعادى.
داۋلەت ەمشى الدىنا كەلگەن قىز-كەلىنشەكتەردىڭ بارىنە وسىنداي ءادىس قولدانادى ەكەن. ءبىراق وبالى نە كەرەك، قۇشاقتاپ ەمدەگەنى ءۇشىن الاتىن اقىسى قىمبات ەمەس كورىنەدى. كىمنىڭ شاماسى قانشاعا كەلەدى، سونى بەرۋىنە بولادى دەيدى داريعا.
«ەندى ول كىسىنىڭ ەمىنىڭ قانشالىقتى شيپالى ەكەنىن بىلمەدىم. سەبەبى مەنىڭ قۇشاقتاۋ مەن ماسساجدان بۇيرەگىم جازىلىپ كەتكەن جوق. جۇكتى دە بولمادىم. ءبىراق ومىردە وسىنداي دا ەمشىلەردىڭ بار ەكەنىن ءبىلدىم»، - دەيدى داريعا.