قىتايدا ۇزاق مەرزىمگە سوتتالىپ ەلگە ورالعان جەرلەسىمىز ۇشاقتان تۇسكەن بويدا جىلاپ جىبەردى
كەشە وسى ەلدەن تاعى ەكى قازاقستاندىق الماتىعا جەتكىزىلدى، - دەپ حابارلايدى ك ت ك ارناسىنىڭ سايتى.
قوس قىلمىسكەر 6 جىل بۇرىن ەسىرتكى تاسىمالداعانى ءۇشىن 19 جانە 20 جىلعا سوتتالعان ەكەن. ەندى ولار قالعان جازاسىن ەلىمىزدە وتەيدى. ەستەرىڭىزگە سالساق، ءبىر اي بۇرىن دا قىتايدان ءتورت وتانداسىمىز ەكستراديتسيالانعان بولاتىن.
بەيجىڭنەن ۇشىپ شىققان اۋە كەمەسى كەشە تاڭەرتەڭ الماتى اۋەجايىنا قوندى. ۇشاق بورتىندا وزگە جولاۋشىلاردان بولەك قوس بىردەي قىلمىسكەر بار. قىتايدا قىلمىس جاساپ، جيىرما جىل جازا ارقالاعانداردى كۇشەيتىلگەن كۇزەتپەن ءتارتىپ ساقشىلارى كۇتىپ الدى. جات جەردە 6 جىلدان بەرى اباقتىدا وتىرعان ۆيكتوريا زەلەنكينا تۋعان جەرگە تابانى تيگەندە كوزىنە جاس الدى.
ۆيكتوريا مەن جارادات وماروۆا 2010 -جىلى ءۇندىستاننان قىتايعا ەسىرتكى الىپ وتكەنى ءۇشىن ۇستالعان ەكەن. سوت شەشىمىمەن ءبىرى 20، ەكىنشىسى 19 جىلعا باس بوستاندىقتارىنان ايىرىلعان. سوندا دا ءۇمىتىن ۇزبەگەندەر ەندى ەلگە ورالدى.
«2010 -جىلى مەنى ەسىرتكى تاسمالداعانىم ءۇشىن بەيجىڭدە قاماۋعا الدى. قالتامدا 610 گرامم گەروين بولعان. ونى ماعان وزبەكستان ازاماتتارى ءۇندىستاننان قىتايعا جەتكىزىپ بەرۋدى سۇراعان ەدى. اقىسىنا ەكى مىڭ دوللار بەرەمىز دەگەن، - دەيدى جازاسىن وتەۋشى ۆيكتوريا زەلەنكينا.
الايدا اقشاعا الدانىپ، قىتاي تۇرمەسىنە تۇسكەن وتانداستارىمىز جازادان جالتارا المايدى. ەندى قوس كەلىنشەك تە جاساعان قىلمىستارى ءۇشىن قازاقستان زاڭدارىنا ساي جاۋاپ بەرەتىن بولادى.
«قازىر قوس ازاماتشا الماتى قالاسىنىڭ ۋاقىتشا قاماۋ اباقتىسىنا جونەلتىلەدى. ارى قاراي قىلمىستىق اتقارۋ جۇيەسى كوميتەتىنىڭ شەشىمى بويىنشا ەلىمىزدەگى تۇزەۋ مەكەمەلەرىنىڭ بىرىنە قامالادى، - دەيدى ق ر باس پروكۋراتۋراسى حالىقارالىق ىنتىماقتاستىق دەپارتامەنتى باستىعىنىڭ ورىنباسارى ءالجان نۇربەكوۆ.
قازىر قىتاي تۇرمەسىندە تاعى ون وتانداسىمىز وتىر. ولاردىڭ ۇشەۋى جاقىندا جازاسىن تولىق وتەپ بوستاندىققا جىبەرىلەدى. ال قالعاندارىن سىرتقى ىستەر مينيسترلىگى مەن باس پروكۋراتۋرا ەلگە جەتكىزۋگە كۇش سالىپ جاتىر. سەبەبى ەكى ەل اراسىندا سوتتالعانداردى قايتارۋ تۋرالى ارنايى كەلىسىم- شارت بار.