ۇلى جىبەك جولىنىڭ تاعى ءبىر قۇپياسى اشىلدى

استانا. قازاقپارات - عالىمدار ۇلى جىبەك جولىنىڭ بۇرىن بەلگىسىز بولىپ كەلگەن بولىگىن تاپتى.

ەڭ ەجەلگى ساۋدا-ساتتىق جولىنىڭ ءبىر بولىگى تيبەتتىڭ بيىك تاۋلارى ارقىلى وتكەن، دەپ حابارلايدى epochtimes.ru.

ارحەولوگتار بۇل بولىكتى تيبەتتىڭ نگاري پرەفەكتۋراسىندا جۇرگىزگەن قازبا جۇمىستارى كەزىندە انىقتاعان. ال سوعان دەيىن بۇل جەردەن شامامەن 1800 جىل بۇرىن سالىنعان زيراتتار تابىلعان ەدى. زەرتتەۋشىلەر جۇرگىزگەن ارحەولوگيالىق قازبا جۇمىستارى بارىسىندا كوپتەگەن قىتايلىق تاۋارلاردىڭ قالدىقتارى شىقتى.

جادىگەرلەر اراسىندا قىتايلىق يەروگليفتەر سالىنعان ادەمى جىبەك ماتاسىنىڭ جىرتىستارى، قوسپاسىز تازا التىننان قۇيىلعان بەتپەردە، سونداي-اق كەراميكالىق جانە قولا ىدىس-اياق بار.

جادىگەرلەر اراسىنان ءشاي وسىمدىگىنىڭ بۇرشىكتەرى تابىلدى، دەپ حابارلايدى 24.kz. جالپى تيبەت جەرىنەن تابىلعان ءشاي قالدىقتارى سوناۋ VII عاسىرعا قاتىستى بولادى. ال نگاري پرەفەكتۋراسىنان انىقتالعان بۇل بۇرشىكتەر ودان 3-4 عاسىر بۇرىن وسىرىلگەن شايدىكى بولىپ شىقتى.

ارتىنشا بەيجىڭدەگى گەولوگيا جانە گەوفيزيكا اكادەمياسىنىڭ عالىمدارى بۇل ءشايدى ساراپتامادان وتكىزدى. سول كەزدە ءشايدىڭ تيبەتتە ەمەس، قىتايدىڭ يۋننان پروۆينتسياسىنان ەكەندىگى بەلگىلى بولدى. سايكەسىنشە، قىتايدان شىعىپ، ۇلى جىبەك جولىنىڭ بويىنا تۇسكەن كەرۋەندەر تيبەت ارقىلى ءوتىپ وتىرعان. «ياعني تاۋلار ارتىنىپ- تارتىنعان كەرۋەندەر مەن ولاردىڭ يەلەرى ءۇشىن ەشبىر كەدەرگى بولماعان»، - دەيدى گارۆارد ۋنيۆەرسيتەتىنىڭ ارحەولوگى روۋەن فلەد.