قازاقستاندا شەتەل ۆاليۋتاسىنا سۇرانىس ايتارلىقتاي تومەندەدى - ق ر ۇلتتىق بانكى

استانا. قازاقپارات - قازاقستاندا شەتەل ۆاليۋتاسىنا سۇرانىس ايتارلىقتاي تومەندەدى.

بۇل تۋرالى بۇگىن «كورپوراتيۆتىك باسقارۋ: قازاقستاننىڭ ينۆەستيتسيالىق تارتىمدىلىعىنا جاڭا كوزقاراستار» اتتى ۇلتتىق فورۋم بارىسىندا ق ر ۇلتىق بانكى ءتوراعاسى دانيار اقىشيەۆ ءمالىم ەتتى.

ق ر ۇلتتىق بانكى دەرەكتەرىنە سايكەس، اعىمداعى جىلدىڭ قاڭتار ايىندا ايىرباس پۋنكتتەرىنەن قازاقستان حالقى 213 ميلليون دوللار ساتىپ العان.

«اقپاندا ءۇردىس كۇشەيە ءتۇستى. تەڭگەگە باسىمدىق بەرىلىپ، حالىق شەتەل ۆاليۋتاسىن ساتا باستادى. سوڭعى 10 جىلدا العاش رەت حالىقتىڭ شەتەل ۆاليۋتاسىن ساتۋى اقپان ايىندا 277 ميلليون دوللار كولەمىندە بايقالدى. ءبىز مۇنان ارى دا اتالعان ءۇردىستىڭ كۇشەيە تۇسەتىندىگىن كۇتۋدەمىز»، - دەدى د. اقىشيەۆ.

ق ر ۇلتتىق بانك باسشىسى كەلتىرگەن دەرەكتەرگە سايكەس، اقپان ايى مەن ناۋرىز ايىنىڭ ءبىرىنشى جارتىسىنىڭ قورىتىندىسىنا سايكەس ۇلتتىق ۆاليۋتاداعى دەپوزيتتەردىڭ ۇلەسى وسە تۇسۋدە. ياعني، دوللارسىزدانۋ ۇدەرىسىنىڭ شىنايى اۋقىمعا يە بولعانىن بايقاۋعا بولادى.

جالپى، ۇلتتىق بانك دەرەكتەرىنە سايكەس، اعىمداعى جىلدىڭ قاڭتار- اقپانىنداعى ۇلتتىق ۆاليۋتامەن ساقتاۋلى دەپوزيت 307,6 ميلليارد تەڭگەگە (6,2 پايىز) ونىڭ ىشىندە حالىق دەپوزيتتەرى 96 ميلليارد تەڭگەگە (6,7 پايىز) ارتقان.

اۆتور: مارلان جيەمباي