«تەمىربەك جۇرگەنوۆ ءوز كابينەتىندە ءماجىلىس وتكىزبەك بولدى. شامامەن العاندا وتىز شاقتى كىسى جينالدى، ىشىندە تەك ەكى ادام - قاراعاندىلىق ب. ن. ورلوۆ جانە مەن ورىس جۇرتىنان ەدىك.
ناركومنىڭ ءوزى دە باسقا سويلەۋشىلەر دە تەك قازاق تىلىندە سويلەپ وتىر. ءبىر كەزدە بوريس نيكولايەۆيچ ورنىنان تۇردى دا جۇرگەنوۆتەن قازاقشا سويلەمەۋىن ءوتىندى، مۇندا نە جايىندا اڭگىمە بولىپ جاتقانىن ءوزى ۇقپاي وتىرعانىن، سويلەۋشىلەردى ول تۇسىنەتىندەي بولۋ ءۇشىن ورىسشا سويلەۋ ءجون ەكەنىن ايتتى. ءبىر كەزدە جۇرگەنوۆتىڭ قارا كوزدەرى ۇشقىنداپ كەتتى. جۇرتتىڭ ءبارى بۇكشيە ءتۇسىپ، تىم-تىرىس بولا قالدى. «ءسىز قايدا وتىرسىز ورلوۆ جولداس! ءسىز قايدا ءجۇرسىز، ءوزىڭىز!» دەپ جۇرگەنوۆ داۋىسىن بۇرىنعىدان دا بەتەر قاتايتا سويلەدى: «ءسىز قازاقستانعا كەلدىڭىز ەكەن، ەگەر دە مۇندا جۇمىس ىستەگىڭىز كەلسە، ءسىز رەسپۋبليكانىڭ مەملەكەتتىك ءتىلىن بىلۋگە مىندەتتىسىز! ءسىز قازاق اندەرىن دە ورىس تىلىندە زەرتتەمەكشىسىز بە؟» - دەپ وزگە ۇلتتان قازاق ءتىلىن قۇرمەتتەۋدى تالاپ ەتتى.
جارىقتىق، جۇرگەنوۆ ءبىر عاسىر بۇرىن بەكەر ەرتە تۋعان ەكەن. قازىرگى زاماندا وزگە ۇلتتى سۇزگىلەي قويماس، الايدا قاسقايعان قازاق ءتىلىن اياق استى ەتكىزبەسى انىق ەدى.
www.bmtv.kz