وزبەكستاندىق قازاق جاستارى - فوتو

استانا. قازاقپارات - ازاتتىقتىڭ فوتو ءتىلشىسىنىڭ كەزەكتى گالەرەياسى تاشكەنت وبلىسىنداعى قيلى- قيلى تاعدىرلى ءھام كاسىپتى ءتورت قازاق جاسىنىڭ بەينەسىن، مىنەزىن، ارمانى مەن بولاشاق تۋرالى ويلارىن سۋرەتتەيدى.

1. 24 جاستاعى ايبول تاشكەنتتەن 30 شاقىرىمداي جەردەگى شىرشىق قالاسىنداعى مەديتسينا كوللەدجىن بىتىرگەن. ازاتتىق ءتىلشىسى كەزدەسكەن كۇنى ول بوستاندىق اۋدانىنداعى جاڭا اۋىل ەلدى مەكەنىندەگى جەدەل جاردەم ستانسياسىندا كەزەكشى ەكەن. مىنا سۋرەتتە ايبول اۋىلدىڭ ءبىر كىشكەنتاي ۇلىنا ۋكول سالماقشى بولىپ تۇر.

 

2. ايبول ۇيلەنگەن، ەكى كىشكەنتاي بالاسى بار. جالاقىسى جاقسىراق بولعانى ءۇشىن تاباقسايداعى ساناتوريگە ورنالاسقىسى كەلەدى. سول ءۇشىن ماسساج كۋرسىن وقي باستاپتى.

 

3. ايبولدىڭ جەدەل جاردەم قىزمەتكەرى رەتىندە كۇندىز سيرەك تۇسەتىن شاقىرۋعا شىققان بەتى.

 

4. 19 جاستاعى نارگيزا قۇلداسوۆا - ءۇيىنىڭ كەنجەسى. تاشكەنتتەگى ءبىر بەلگىلى مەديتسينا كوللەدجىن بىتىرگەن. قازىر ستاموتولوگيا كابينەتىندە جۇمىس ىستەپ ءجۇر. مەديتسينا سالاسىن شەشەسىنىڭ قالاۋى بويىنشا تاڭداسا دا، كەيىن بۇل ماماندىقتى جاقسى كورىپ كەتكەنىن ايتادى. جۋىردا مەديتسينا ۋنيۆەرسيتەتىنە تۇسپەكشى.

 

5 نارگيزا جۇرگىزۋشى كۋالىگىن الۋ ءۇشىن كۋرس وقىپ ءجۇر. «ءساۋىردىڭ 12 سى كۇنى كۋالىگىم قولىما تيەدى. پاپام ءوزىنىڭ Chevrolet Cobalt ىن بەرمەكشى» دەيدى ول قۋانىشتى كەيىپپەن. 

6. «قازاقستانعا كەتەر مە ەدىڭ؟»  دەگەن سۇراعىما نارگيزا: «وقۋعا بارار ەدىم، ءبىراق تۇرماس ەدىم. تاشكەنتىم ۇنايدى» دەپ جاۋاپ قايىردى. 

7. 31 جاستاعى الىبەك قابدۋراحمانوۆ تاشكەنت كونسەرۆاتورياسىنىڭ ماگيستراتۋراسىن «ۇرمالى اسپاپتار» ماماندىعى بويىنشا ۇزدىك بىتىرگەسىن ديريجەرلىك كاسىپتى تاڭداعان. ءبىر جىل بۇرىن ۇلتتىق سيمفونيالىق وركەستردىڭ ديريجەرى بولىپ تاعايىندالعان. «نەگە ديريجەر بولعىڭ كەلدى؟» دەپ سۇراسام: «مۋزىكانتتاردى جاقسى كورەم، سوسىن بويىمدا جەتەكشى بولۋعا دەگەن ىنتا بار» دەپ كۇلدى. الىبەك مۋزىكانتتاردى تىڭداي بىلەتىن، ەستي الاتىن ادامداردىڭ از ەكەنىن ايتادى.

 

8. الىبەك وزبەكتىڭ ۇلتتىق اسپاپتارىن جاقسى كورەتىنىن ايتادى. «وتىرىقشى حالىقتاردىڭ مۋزىكاسى ساراي ءۇشىن جازىلدى عوي. سوندا دا ينتەللەكتۋالدىق مازمۇنى تەرەڭ، بىردەن ءتۇسىنۋ قيىن» دەيدى ول. جاس ديريجەر «شاشماقام» جانرىن ەرەكشە ۇناتادى. «بىزگە مۋزىكانى ساقتاپ، دامىتۋ ءۇشىن ەشكىم جاعداي جاساپ بەرە قويمايدى. ءبارىن ءوزىمىز جاساۋىمىز كەرەك» دەيدى الىبەك. «استاناعا كەتەر مە ەدىڭ؟ ول جاقتا مۋزىكانتتاردىڭ تابىسى جاقسى عوي» دەگەن سوزگە ديريجەر: «تۇسىنەم، ءبىراق ءبارىن اقشامەن ولشەۋگە كەلمەيدى. وزبەكستاندى، تاشكەنتتى، مۋزىكانتتارىمدى جاقسى كورەم» دەپ جاۋاپ بەردى.

 

9. ءتىلشى سۋرەتكە ءتۇسىرىپ جاتقاندا الىبەكتىڭ الدى ادامنان بوسامادى. مۋزىكانتتاردىڭ ونى جاس بولسا دا سىيلايتىنى، كوپ كەڭەس سۇرايتىنى بايقالادى. 

10. «اكە- شەشەم مۋزىكادان الىس ادامدار بولسا دا، الىبەك دىنىشەۆتىڭ قۇرمەتىنە اتىمدى الىبەك دەپ قويىپتى. بالكىم وسى فاكت تە مۋزىكانت بولۋىما اسەر ەتكەن شىعار» دەيدى ديريجەر.

 

11. تاشكەنت تۇبىندەگى ابايدا تۋعان 26 جاستاعى پەريزاتتى كۇيەۋى قىزىل سۋعا الىپ قاشقان. ءداستۇرلى وتباسىنداعى كەلىن رەتىندە كوپ سويلەمەيتىن پەريزاتتىڭ ورنىنا ءتىلشى قويعان سۇراقتارعا انار اپا اتتى تۋىسقانى جاۋاپ بەرىپ وتىردى.

 

12. «كەلىندەرىڭىزدىڭ ءبارى وزبەكستاننان ەكەن. قازاقستاننان قىز تابىلمادى ما؟» دەگەن ساۋالعا انار اپا: «ءويبۇۋ، قازاقستاننىڭ قالىڭ مالى قىمبات قوي» دەدى.

 

13. وسى وڭىردەگى باسقا دا كەلىندەر سياقتى پەريزات ءۇنسىز-ءتۇنسىز ءۇي شارۋاسىن اتقارىپ جۇرەدى. كونسەراۆتيۆتىك ورتاداعى تۇسىنىك بويىنشا جوعارى ءبىلىم الماسا دا، كۇيەۋگە شىققان ايەلدىڭ مارتەبەسى جوعارى سانالادى.

 

14. قازاقستانعا كوشۋ جوسپارى تۋرالى سۇراعاندا پەريزات ءۇشىن جاۋاپ بەرگەن انار اپا: «قايداعى قازاقستان. بۇنىڭ كۇيەۋى نۇربەك - ءۇيدىڭ جالعىز ۇلى. ول جاققا بارۋ ءۇشىن ءبىر نەگىز كەرەك. اۋەلى اعايىندىلاردىڭ ءبىرى بارىپ، ورنىعىپ العان سوڭ قالعان تۋىستارىن تارتىپ اكەتەدى. نۇربەك جالعىز عوي» دەدى.

«ازاتتىق»