قۇرت پەن قىمىز قىتايعا ەكسپورتتالادى

استانا. قازاقپارات - قازاقتىڭ ۇلتتىق تاعامدارى قىمىز بەن قۇرتتى قىتايلىق كاسىپكەرلەر زەرتحانالىق ساراپتامادان وتكىزىپ، جوعارى ساپالى ءونىم تۇرىنە جاتقىزدى.

بۇعان دەيىن قىمىز وندىرىسىمەن تانىمال بولعان پاۆلوداردىڭ «ساعىپ» شارۋا قوجالىعى ەندى قۇرت جاساۋدى قولعا الدى، دەپ حابارلايدى 24.kz تەلەارناسى.

«ساعىپ» قىمىزى بۇگىندە استاناداعى 8 ءىرى سۋپەرماركەتتە، سونداي-اق ماسكەۋدەگى قازاق ونىمدەرى ساۋدالاناتىن دۇكەندە ساتىلادى. ەشبىر قوسپاسى جوق، تابيعي ونىمگە قىزىققان قىتاي كاسىپكەرلەرى مول كولەمدە تاپسىرىس بەرىپ وتىر»، دەلىنگەن حابارلامادا.

سۇرانىستىڭ ارتۋى شارۋاشىلىق اۋقىمىن كەڭەيتۋگە مىندەتتەپ وتىر. «ەندى جىلقىمەن قاتار ساۋىن سيىرلار الىپ، قۇرت-ىرىمشىك وندىرىسىنە مىقتاپ كىرىسەمىز»، - دەيدى كاسىپكەر.

ءبىر قىزىعى، قىتايلاردىڭ جۇرەگىن جاۋلاعان قۇرت كادىمگى اجەلەرىمىزدەن جەتكەن كونە ادىسپەن قاراپايىم تۇردە دايىندالادى.

«قازىرگى ساتتە ءبىز قۇرتتىڭ ەكى ءتۇرىن ىستەپ جاتىرمىز. ءبىرى - شايعا ارنالعان ءتاتتى قۇرت، ەكىنشىسى سورپاعا ارنالعان اشى قۇرت بولىپ سانالادى. بۇل قۇرتتار ەرتە زاماننان كەلە جاتقان اپا-اجەلەرىمىزدىڭ تەحنولوگيا بويىنشا جاسالادى»، - دەيدى شارۋا قوجالىعىنىڭ مامانى ماحبۇل ازامات.

ۇلتتىق ءونىمدى قىتايعا ەكسپورتتاۋ ءۇشىن سول جاقتا ساراپتامادان وتكىزىلگەن.

«وسى قىتاي ەلىنەن كەلگەن كاسىپكەرلەر ءبىزدىڭ ونىمدەرگە وتە ۇلكەن قىزىعۋشىلىق تانىتىپ وتىر. ەڭ ءبىرىنشى ونىمدەرىمىزدىڭ ءبىرىنشى پارتياسىن 220 ليتر قىمىزبەن 60 كەلى قۇرتىمىز قىتاي ەلىنە ءوتىپ، ودان سەرتيفيكاتتان ءوز جاقتارىنان وتكىزىپ سودان ولار قىزىعۋشىلىق تانىتىپ وتىر»، - دەيدى شارۋا قوجالىق باسشىسى تولەۋ قۇشمانوۆا.