الاياقتاردىڭ قۇربانى بولعان قازاقستاندىق انشىلەر
تولقىن زابيروۆا
ءانشى تولقىن زابيروۆانىڭ اتىنان بەلگىسىز بىرەۋ كۇماندى بايقاۋ ۇيىمداستىرىپ، قوماقتى اقشا تاۋىپ ءجۇر. مۇنى ينستاگرام جەلىسىنەن كورگەن ءانشى، ءوز كوزىنە ءوزى سەنە المادى.
«كوبىسى ايتادى، وسى لايك ارقىلى ءبىر بيزنەس جاسايدى دەپ، جارناما سالادى، ودان وزدەرى اقشا تابادى. ەندى جارايدى، تابا بەر، وزىڭە جاقسى بولسا جاساي بەر، وعان ەشقانداي قارسىلىعىم بولماعان. ءبىراق، وسى ايفوندى ويناتپاعاندا، ارينە، سولاي جالعاسا بەرەتىن ەدى. اشۋىمدى كەلتىردى»، - دەيدى ءانشى تولقىن زابيروۆا.
بەلگىسىز قولدانۋشى الەۋمەتتىك جەلىدە تولقىننىڭ اتىنان پاراقشا اشىپ، ونى ءبىر جىلداي قولدانعان. ءتىپتى 22 مىڭ وقىرمان دا جيناپ ۇلگەرگەن. تولقىن بۇل ءجايتتان حاباردار بولعانىمەن، الاياق قولدانۋشىنىڭ سوڭعى جاساعان ارەكەتى ءانشىنىڭ شىدامىن تاۋىسىپ، اشۋ-ىزاسىن ءبىر-اق تۋدىردى.
«ماعان قوڭىراۋ شالا بەرەدى. جۇمىستا بولسام مازالاپ. ايفوندى قالاي الىپ كەتۋگە بولادى دەپ مازالايدى»، - دەپ جالعاستىردى تولقىن.
اسا سابىرلى ءانشى جالعان اككاۋنت يەسىن ىزدەپ تاۋىپ، قۇپيا ءسوزىن وزىنە قايتارىپ الادى. وسىلايشا، ەندى ءانشىنىڭ الەۋمەتتىك جەلىسىنە ەشكىم جالعان اقپارات سالىپ قول سۇعا المايدى.
وكتەم التايەۆ
ءدال وسىنداي جاعداي تەك تولقىننىڭ باسىنان عانا وتپەگەن. جاقىندا ءانشى وكتەم التايەۆ تا الاياقتاردىڭ قۇربانى بولدى. ەل ءسۇيىپ تىڭدايتىن «قارىنداسىم»، «جۇمباق قىز»، «اق ساۋلەم» اتتى حيت اندەرىن ۇرلاپ، سودان مول پايدا تاپقان.
«مەنىڭ ءوز باسىمدا ونداي جاعدايلار كوپ بولدى. مەنىڭ فونوگرامامدى قويىپ، داۋىسىما كەلتىرىپ، فونوگرامامەن كاباك، رەستورانداردا ولەڭ ايتىپ، قىرۋار اقشا تاۋىپ، ءۇي الىپ، استىنا كولىك مىنگەن جىگىتتەر دە بولدى»، - دەيدى ول.
ءتىپتى، ءانشىنىڭ دايىن فونوگراماسىن پايدالانىپ قانا قويماي، وپ-وڭاي گاسترولدىك ساپارلارعا دا شىعىپ جۇرگەن. الايدا، ءانشى دوستارىنىڭ ارقاسىندا ونى قولعا تۇسىرگەن.
ءانشى ونداي پىسىق جىگىتتىڭ ەسىمىن جاقسى بىلەدى. ءتىپتى ول وكتەمدى قادىرلەپ بىرنەشە رەت تويىنا دا شاقىرعان.
«سەرىك دەگەن جىگىت. سارى اعاشتىڭ جىگىتى. كويلەگىن كيىپ قۋاندىق، ءبىراق ونەر دەگەن حالىقتىكى عوي، مەنىڭ اندەرىم كادەگە جاراپ جاتسا، ءبىر ادامنىڭ جاعدايىن تۇزەپ جاتاتىن بولسا، ماعان ول دا قۋانىش. مەنتاليتەت سونداي، مەن وعان ەشتەڭە ايتقان جوقپىن»، - دەيدى وكتەم.
باقىت شادايەۆا
ءانشى باقىت شادايەۆا ەش ۋاقىتتا كەلەڭسىز جايتقا تاپ بولىپ كورمەپتى. ون جىلداي ساحنادان كورىنبەي كەتكەن ءانشى ءوز كورەرمەنىن ساعىنعانىن ايتادى. مەملەكەتتىك جۇمىستان ازىرگە باس تارتقان ونەر يەسى ساعىنىشىن باسۋ ءۇشىن الماتىدا بەينەبايان ءتۇسىرىپ، ونەرىن قايتا قولعا الدى.
ونەر جۇلدىزدارى ءجيى الاياقتاردىڭ قۇربانى بولىپ جاتادى. ماسەلەن، ءمادينا سادۋاقاسوۆانىڭ اتىنان بىرەۋلەر تۇشپارانىڭ بەتىن جارنامالاسا، اكتريسا اسەل ساعاتوۆا، پروديۋسەر بايان ەسەنتايەۆا، حالىق ءارتىسى روزا رىمبايەۆا ارىقتاۋدىڭ جولدارىن كورسەتىپ، كوك شايدى ساتىپ الۋعا ۇگىتتەگەن.
الايدا، ارتىنان ونىڭ وتىرىك ەكەنى انىقتالدى. جاقىندا الاياقتار حالىق ءارتىسى ماقپال ءجۇنىسوۆانى دا مازالاعان. توعىز جىل بۇرىن اۋەجاي قىزمەتكەرلەرىمەن داۋلاسقان ۆيدەوسىن باسىپ العان بەلگىسىز بىرەۋلەر عالامتوردان ءوشىرۋ ءۇشىن انشىدەن قوماقتى قارجى تالاپ ەتكەن. سوڭعى ۋاقىتتا وسىنداي جولمەن پايدا تاباتىندار كوبەيگەنى راس.