قىتايدا تۇراتىن قانداسىمىز قازاقستان استاناسىندا ريو وليمپياداسىنىڭ جولداماسىن جەڭىپ الدى

استانا. قازاقپارات - استانا تورىندەگى «داۋلەت» سپورت كەشەنىندە ءوتىپ جاتقان كۇرەس تۇرلەرىنەن ازيانىڭ ريو وليمپياداسىنا ىرىكتەۋ جارىسىندا ەركىن كۇرەستەن 65 كەلىدە سىنعا تۇسكەن قىتايلىق قانداسىمىز ەرلانبەك كاتەي ۇلى فينالعا شىعىپ، قىتاي ەلى اتىنان ريو وليمپياداسىنىڭ جولداماسىن جەڭىپ الدى.

ميلليارد قىتايدىڭ ىشىنەن ۇزدىكتەردىڭ ۇزدىگى اتانىپ جۇرگەن قانداسىمىز وسىدان تۋرا ءتورت جىل بۇرىن دا استانا تورىندە لوندون وليمپياداسىنىڭ جولداماسىنا تالاسقان بولاتىن. الايدا، سول كەزدە شيرەك فينالدا قازاقستاندىق اقجۇرەك تاڭاتاروۆقا جول بەرىپ، لوندونعا بارا الماعان بولاتىن.



سول كەزدە ول «جىعىلسام، ءوز قازاعىمنان جىعىلدىم. وكىنبەيمىن، ەندى كەلەسى وليمپياداعا بارۋعا تىرىسامىن» دەگەنى ەسىمىزدە. مىنە، سول ارمانى بۇگىن ورىندالدى. ەندى ريو-دە-جانەيرو وليمپياداسىندا قازاق بالۋانى قىتاي ەلىنىڭ اتىنان سىنعا تۇسەدى.

ەرلانبەك كاتەي ۇلى 1990-جىلى قىتايدىڭ التاي ايماعىندا قىزىلتاس قالاشىعىندا دۇنيەگە كەلگەن. قازىر ەركىن كۇرەستەن قىتاي ۇلتتىق قۇراماسىنىڭ بەلدى مۇشەلەرىنىڭ ءبىرى.

كۇنسۇلتان وتارباي