ەرتە قارتايۋ اۋرۋىنا شالدىققان نۇرجان وركەشبايەۆ شوۋ- بيزنەستى باعىندىرماقشى

استانا. قازاقپارات - ەرتە قارتايۋ اۋرۋىنا شالدىققان اتىراۋلىق نۇرجان وركەشبايەۆ قازاقستان شوۋ-بيزنەسىن باعىندىرۋعا نيەتتى.

بۇل جونىندە ول Tengrinews.kz تىلشىسىنە بەرگەن سۇحباتىندا ايتىپ بەردى.

انشىلىكتى ەندى عانا باستاعان جىگىتتىڭ ايتۋىنشا، قازىر وتاندىق شوۋ-بيزنەسكە قادام باسۋ جولىنداعى العاشقى جۇمىستار جۇرگىزىلىپ جاتىر. «بولاشاقتا شوۋ-بيزنەستە باعىمدى سىناپ كورگىم كەلەدى، قازىر وسى باعىتتا جۇمىس ىستەپ جاتىرمىز. جازىلىپ جاتقان العاشقى ءانىمدى ءوزىم تۋىپ-وسكەن اۋىلىما ارنايمىن. وسىعان دەيىن بىرنەشە رەت كومەك قولىن سوزعان اتىراۋلىق نار تۇلعالى اعالارىم وسى جولى دا كومەك كورسەتەدى دەگەن ويدامىن»، - دەدى نۇرجان.

جىگىتتىڭ ايتۋىنشا، قازىر ول پروديۋسەرمەن بىرگە جۇمىس ىستەپ جاتىر. نۇرجان انا تىلىندە جازىلعان اندەردى ورىنداۋعا نيەتتى ەكەنىن دە جەتكىزدى. دەگەنمەن ول العاشقى ءانىنىڭ اۆتورلارىن اتاۋدان باس تارتتى. سونىمەن قاتار، وركەشبايەۆ ومىرىندەگى ماڭىزدى وزگەرىستەردى جازدا ۇلكەن جاڭالىق ەتىپ جاريالاۋعا ۋادە بەردى.

ايتا كەتەيىك، دارىگەر بولات بايىروۆ نۇرجان وركەشبايەۆتىڭ دەنساۋلىعى جونىندە ايتىپ بەردى. «مەن ونى قايتادان تەكسەرىلۋگە شاقىرىپ كوردىم. دەگەنمەن نۇرجان ومىرىندە كوپ وزگەرىس بولعاندىقتان، كەلۋدەن باس تارتتى. قازىرگى جاعدايىنا ونىڭ كوڭىلى تولادى»، - دەدى بايىروۆ.

دارىگەردىڭ ايتۋىنشا، نۇرجانعا وپەراتسيالاردىڭ بارلىعى تەگىن جاسالعان. «نۇرجان قازىر ۇيلەنگەن، ءانشى، تامادا رەتىندە شوۋ-بيزنەسپەن اينالىسىپ تا ءجۇر. وپەراتسيا وعان ەكى ەسە جاس كورىنۋگە مۇمكىندىك بەردى. قازىر ول شامامەن 23-24 جاستا، وپەراتسيا جاساتقان كەزدە 21 جاستا بولاتىن. ۋاقىتى جوق ەكەنىن ايتىپ، سوڭىنا دەيىن بارۋدان باس تارتتى. وعان وپەراتسيالار تەگىن جاسالدى، سوندىقتان دا، اقشا ەمەس، ۋاقىت جەتپەگەندىكتەن باس تارتىپ وتىر»، - دەدى مامان.

ەسكە سالايىق، 2011 -جىلى نۇرجانعا بىرنەشە وپەراتسيا جاسالدى، ناتيجەسىندە ول بىرنەشە جىلعا جاسارىپ شىعا كەلدى. كەيىن نۇرجان اتىراۋداعى "نۇرسايا" ىقشاماۋدانىنان ءبىر بولمەلى پاتەر الدى. ال 2015 -جىلدىڭ جازىندا ول ۇيلەندى. تويعا شامامەن 500 ادام كەلدى.