بالاعا تەك اتا-اناسى عانا ۇيرەتەتىن كەيبىر ىستەر

نۇر- سۇلتان. قازاقپارات - كەيبىر اتا- انالار بالا وقۋ جاسىنا جەتكەندە مەكتەپكە بەرسە بولدى، بارلىعىن وقىتۋشى ۇيرەتەدى دەپ قارايدى، شىندىعىندا كەيبىر ىستەردى تەك اتا- انا عانا بالاعا ۇيرەتە الادى. سونىڭ بىرنەشەۋىن تىلگە تيەك ەتسەك.

- بالادا كىتاپ وقۋعا بولعان قىزىعۋشىلىقتى جەتىلدىرۋ. كىتاپ وقۋدى جاقسى كورەتىن اتا- انا جانە كىتاپ كوپ بولعان وتباسىندا ەرجەتكەن بالانىڭ كىتاپ وقۋعا بولعان قىزىعۋشىلىعى باسقا بالالارعا قاراعاندا كۇشتى بولادى. بۇل قىزىعۋشىلىقتى جەتىلدىرۋدە، ءسوزسىز، اتا-انا ۇلگى بولۋ كەرەك. بالا قىزىعاتىن سۋرەتتى كىتاپتى ونىمەن بىرگە كورۋ بالانىڭ سول تۇردەگى كىتاپتى كورۋگە بولعان قىزىعۋشىلىعىن قوزعايدى.

- بالاعا مەيىرىمگە تولى بولعان تۇرمىس ورتاسىن جاساپ بەرۋ كەرەك. وتباسىنىڭ تىنىش تا، ىنتىماقتى بولۋى بالانىڭ ءوسىپ-جەتىلۋىنە ەرەكشە اسەر ەتەدى. اقاۋسىز بولعان وتباسى ورتاسى مەن وتباسى تاربيەسى بالانىڭ جاقسى تۇرمىس ادەتى مەن ادەبىن جەتىلدىرۋدە زور ءرول اتقارادى.

- بالاعا ساتسىزدىككە توتەپ بەرۋدى ۇيرەتۋ. بالا ۇيرەنۋ جانە تۇرمىستاعى شىنايى جاعدايلارعا (باسىمدىلىقتارعا) توتەپ بەرە الاتىن بولعاندا عانا اتا-انانىڭ الاڭداۋى ازايادى. جەڭىلگەندە جاسىماۋدى دا اتا-انا ۇيرەتەدى. جەڭىلىستى قابىلداي بىلگەن بالالاردىڭ ءوز جولىن دۇرىس تاڭداۋعا مۇمكىندىگى مول.

- ۇساق تۇرمىس ىستەرىن باسقارۋ قابىلەتىن جەتىلدىرۋ. اتا-انانىڭ تۇرمىس ادەتى بالالاردىڭ سول تۇردەگى تۇرمىس ادەتىن قالىپتاستىرۋدا تۇرتكىلىك ءرول اتقارادى. اتا- اناسىنىڭ قيمىلى جەڭىل، شاپشاڭ بولسا كوبىنەسە بالا دا سول ارتىقشىلىقتاردى قابىلدايدى.

- قاۋىپسىزدىك تاربيەسىن كوڭىل ءبولۋ. اتا- انالار ادەتتە وتباسىندا بالاعا قاۋىپسىزدىك تاربيەسىن بوساڭسىتپاۋى كەرەك. اسىرەسە كولىككە وتىرعاندا مۇقيات بولۋدى قايتا-قايتا قاداعالاپ وتىرۋ ءلازىم.

- بالانىڭ قارسىلاسۋ مەزگىلىندەگى تاربيەگە نەمقۇرايدى قاراماۋ كەرەك. بالا ءتورتىنشى، بەسىنشى سىنىپقا شىققاندا وزىمبىلەمدىككە سالىنىپ ءبىراز ءتىل المايتىن جاعدايلار كەزدەسەدى. بۇل كەزەڭدە بالانىڭ مىنەزىن قاداعالاي بايقاپ - ءبىرمويىندىعىنا جول بەرمەۋ كەرەك.