ەلوردا ناۋرىز مەيرامىنا دايىندىق ۇستىندە

استانا. قازاقپارات - بيىل ناۋرىز مەيرامى بەس كۇن بويى تويلانادى.

ناۋرىزدىڭ 19 ى مەن 23 ى ارالىعىندا قالادا 70 جۋىق مادەني- بۇقارالىق شارا ۇيىمداستىرىلادى.

ەلوردا قازىردەن باستاپ كوكتەم مەرەكەسىنە دايىندىق ۇستىندە، دەپ حابارلايدى astana.kz. عيماراتتاردىڭ قاسبەتتەرى بەزەندىرىلىپ، جارقىراعان كونسترۋكسيالار مەن ۇلتتىق ناقىشتاعى شاعىن ارحيتەكتۋرالىق پىشىندەر ورناتىلادى.

ەلوردا كوشەلەرىندە جارىق يلليۋميناتسيالىق اركالار، جارىق ديناميكالىق پاننو مەن جولداردىڭ بويىندا جارقىراعان اعاشتار جاسالادى. بارلىق قالالىق ساياباقتاردا شاعىن ارحيتەكتۋرالىق پىشىندەر قويىلادى. «استانالىق» پاركتە «جار جار»، قابانباي باتىر داڭعىلى مەن كەرەي جانە جانىبەك حاندار كوشەسىنىڭ قيىلىسىندا «جەلپۋىشتەر» دەكوراتسياسى، سونداي- اق، «كەرۋەن»، «شارلار ورنەگى»، «توي»، «ورنەكتەلگەن اعاشتار» جانە ت. ب. شاعىن ارحيتەكتۋرالىق پىشىندەر ورناتىلادى.

قالالىق الاڭدا مەرەكەلىك كيىز ۇيلەر تىگىلىپ، التىباقاندار بولادى، جەڭىس داڭعىلى مەن كەنەسارى كوشەسىنىڭ، جەڭىس داڭعىلى مەن اباي داڭعىلىنىڭ، جەڭىس داڭعىلى مەن جانگەلدين كوشەسىنىڭ، جەڭىس جانە بوگەنباي باتىر داڭعىلدارىنىڭ، جەڭىس داڭعىلى مەن ماسكەۋ كوشەسىنىڭ قيىلىستارىندا، تەمىرجول ۆوكزالىنىڭ اۋماعىندا 20 «بايشەشەكتەر» كومپوزيتسياسى ورناتىلادى.

ەلوردانى مەرەكەلىك بەزەندىرۋدىڭ استانا تۇرعىندارى مەن قوناقتارىنىڭ كوڭىلىنەن شىعاتىنى ءسوزسىز.

مەرەكە كۇندەرى حالىقتىق سەرۋەن ۇيىمداستىرىلادى. «استانا ارەنا» ستاديونىنىڭ الدىنداعى الاڭدا، «قازاق ەلى» مونۋمەنتىنىڭ الدىندا، قالالىق الاڭدا، «ستۋدەنتتىك» جانە «جەرۇيىق» ساياباقتارىندا، «جاستار» تەاترىنىڭ الدىنداعى الاڭدا، ميچۋرينو جانە جەلەزنودوروجنىي كەنتتەرىندە، «شىعىس يلينكا»، «پريگورودنىي»، «ءوندىرىس» تۇرعىن الاپتارىندا، № 20 ورتا مەكتەپ اۋماعىندا، سونداي-اق، «ناز» مەملەكەتتىك ءبي تەاترىنىڭ الدىندا مەرەكەلىك شارالار وتەدى. قالا تۇرعىندارىنىڭ نازارىنا شىعارماشىلىق ۇجىمداردىڭ كونتسەرتتەرى مەن كيىز ۇيلەردە ۇلتتىق تاعامدار ۇسىنىلاتىن بولادى، ۇلتتىق ويىنداردان جارىستار وتكىزىلەدى.

22-27 -ناۋرىزدا كونگرەسس-حوللدا كۇن سايىن ساعات 10.00-20.00 «ناۋرىز - 2016» كورمە- جارمەڭكەسى، ال 21-23 -ناۋرىزدا «جاستار» سارايىندا «جاستار كوكتەم لەبى» فەستيۆالى اياسىندا قولدانبالى ونەر كورمەسى وتەدى.

سونىمەن قاتار، ناۋرىز مەيرامىنا وراي «جاستار» تەاترىندا، م. گوركي اتىنداعى مەملەكەتتىك اكادەميالىق ورىس دراما تەاترىندا جانە قۋىرشاق تەاترىندا مەرەكەلىك قويىلىمدار كورسەتىلەدى. 21 -ناۋرىزدا «سارىارقا» رەسپۋبليكالىق ۆەلوترەگىندە ساعات 12.00 ۇلكەن مەرەكەلىك كونتسەرت، سونداي-اق كونگرەسس- حوللدا ساعات 18.00 تاعى دا ءبىر كونسەرت وتەدى.