ۇلتتىق مۋزەيدە اتا-اناسىنىڭ قامقورلىعىنسىز قالعان سابيلەردىڭ تۇساۋىن كەسۋ ءراسىمى ءوتتى
سابيلەردىڭ تۇساۋىن كەسۋگە قازاقستاننىڭ ەڭبەك سىڭىرگەن ءارتىسى، بىرنەشە حالىقارالىق بايقاۋلاردىڭ جەڭىمپازى مايرا مۇحامەد قىزى، «استانا اقشامى» ج ش س ديرەكتورىنىڭ ورىنباسارى، بەلگىلى جۋرناليست زەيىن الىپبەك، حالىقارالىق بايقاۋلاردىڭ جەڭىمپازى، اقىن قالقامان سارين، «بالاپان» تەلەارناسىنىڭ ديرەكتورى، تەلەجۇرگىزۋشى ءلايلا سۇلتان قىزى، بەلگىلى ساياساتتانۋشى- جۋرناليست جارقىن تۇسىپبەك ۇلى ءتارىزدى تانىمال تۇلعالار شاقىرىلدى.
«تۇساۋكەسەر» ءراسىمى» جوباسىنىڭ جەتەكشىسى، مۋزەيتانۋشى نۇرسەرىك جولبارىس جۋرناليستەرگە بەرگەن سۇحباتىندا اتالعان شارانىڭ ماڭىزىنا توقتالىپ ءوتتى.
«قارياسىن «قازىنام»، ۇلىن «ۇرپاق جالعاستىرارىم»، قىزىن «ءورىسىمدى كەڭەيتەرىم» دەپ بىلگەن حالقىمىز ءۇشىن ءار سالت-ءداستۇردىڭ ورنى ەرەكشە بولعان. دۇنيەگە كەلگەن ساتىنەن باستاپ ءسابيىن ەلى مەن جەرىن سۇيۋگە، حالقىنىڭ مۇراسىن قاستەرلەۋگە تاربيەلەيتىن اسىل داستۇرلەرىمىز ۇلتتىق مۋزەيدىڭ قايىرىمدىلىق جوباسىندا ءوز جالعاسىن تاۋىپ وتىر. بۇل جوبا مەملەكەتتىك دەڭگەيدە باستالعان «جاقسىلىق جاسا» اتتى حالىقتىق جوباسىنىڭ اياسىندا وتكىزىلدى. وسىدان ءبىراز ۋاقىت بۇرىن باستالعان بۇل جوباعا بۇكىل قازاقستاندىقتار اتسالىستى. جوبا ءوز جالعاسىن تاۋىپ كەلەدى. ۇلتتىق مۋزەي ۇجىمى دا بۇل جوبادان قالىس قالماي اتا-اناسىنىڭ قامقورلىعىنسىز قالعان بالالار ءۇشىن «تۇساۋكەسەر» ءراسىمى» جوباسىن قولعا الدى. جوبا الداعى ۋاقىتتا ءداستۇرلى تۇردە ءوتىپ تۇراتىن بولادى. جەتىمىن جىلاتپاعان بابالارىمىزدىڭ اسىل قاسيەتىنىڭ وسىنداي جوبا ارقىلى كورىنىس تاپقانىنا قۋانىشتىمىز، - دەدى ن. جولبارىس.
قازاقستاننىڭ ەڭبەك سىڭىرگەن ءارتىسى مايرا مۇحامەد قىزى بالالاردىڭ بولاشاعىنا اق جول تىلەپ، ءوزىنىڭ انالىق لەبىزىن ءبىلدىردى.
«ءوزىم انا بولعان سوڭ، وسى ءىس-شاراعا ارنايى كەلدىم. ناۋرىز مەرەكەسىنە وراي وتكىزىلىپ جاتقان «تۇساۋكەسەر» راسىمىنە قاتىسقانىم ءۇشىن دە وتە قۋانىشتىمىن. مۇنداي ءىس-شارالار ءداستۇرلى تۇردە جولعا قويىلسا نۇر ۇستىنە نۇر بولار ەدى. ءبىراق ءبىزدىڭ قازاق جاستارى بالا ماسەلەسىنە جەڭىل قاراماسا ەكەن دەيمىن. ول ۇلكەن جاۋاپكەرشىلىكتى قاجەت ەتەتىن دۇنيە. سونىمەن قاتار، جەتىمدەر ءۇيى بولماسا ەكەن دەيمىن. بۇل بۇلدىرشىندەر ماحابباتقا، مەيىرىمگە ءزارۋ كەلەدى. سوندىقتان دا ولاردى سۇيىسپەنشىلىككە بولەۋ ءبارىمىزدىڭ ادامدىق بورىشىمىز»، - دەدى م. مۇحامەد قىزى.
سونىمەن قاتار، قالقامان سارين، ءلايلا سۇلتان قىزى، زەيىن الىپبەك، جارقىن تۇسىپبەك ۇلى بالالاردىڭ تۇساۋىن كەسىپ، اق تىلەكتەرىن ارنادى. جوبا اياسىندا استاناداعى سابيلەر ءۇيىنىڭ 5 تاربيەلەنۋشىسىنىڭ تۇساۋى كەسىلدى. تۇساۋكەسەر راسىمىندەگى فوتوسۋرەتتەر مەن تاپسىرىلاتىن سەرتيفيكاتتار بالالاردىڭ جەكە ءىس-پاراعىنا تىگىلىپ، بولاشاقتا وزدەرىنىڭ تۇساۋىن كەسكەن تۇلعالاردى ءبىلىپ ءجۇرۋى ءۇشىن ساقتالاتىن بولادى.
ناۋرىز مەرەكەسىنە وراي وتكىزىلگەن بۇل شارا الداعى ۋاقىتتا ءار مەرەكە سايىن ءوز جالعاسىن تاپپاق.
اۆتور: مارلان جيەمباي