ۇلتتىق مۋزەيدە ۇلىستىڭ ۇلى كۇنىنە وراي مەرەكەلىك ءىس-شارالار باستالدى - فوتو

استانا. قازاقپارات - بۇگىن قازاقستان رەسپۋبليكاسى ۇلتتىق مۋزەيىندە ۇلىستىڭ ۇلى كۇنىنە وراي باستاۋىش جانە ورتا سىنىپ وقۋشىلارىنا ارنالعان «ارمىسىڭ، ءاز ناۋرىز!» اتتى مەرەكەلىك ءىس-شاراسى باستالدى، دەپ حابارلايدى ۇلتتىق مۋزەيدىڭ اقپاراتتىق- يميدجدىك قىزمەتى.

شارا اياسىندا مەكتەپ وقۋشىلارى تەاترلاندىرىلعان قويىلىم تاماشالادى. اڭىز كەيىپكەرلەرى قىدىر اتا مەن ۇماي انا بالالارعا باتا بەردى، الدار كوسە مەرەكەمەن قۇتتىقتادى. سونىمەن قاتار، اجەلەردەن قۇرالعان توپ اننەن شاشۋ شاشتى.

مەرەكەلىك جيىندا قول كۇرەسىنەن، اسىق اتۋدان، ارقان تارتۋدان جارىس وتكىزىلىپ، جەڭىمپازدارعا سىيلىقتار ۇلەستىرىلدى.

«ارمىسىڭ، ءاز ناۋرىز» مەرەكەلىك ءىس- شاراسىن وتكىزۋدەگى باستى ماقسات - ۇلىستىڭ ۇلى كۇنىن تاربيە تەتىگى رەتىندە پايدالانا وتىرىپ، جاس ۇرپاققا قازاق حالقىنىڭ باي مادەني مۇراسىن تانىتۋعا، سالت-ءداستۇرىن قۇرمەتتەۋگە باۋلۋ.

ايتا كەتەيىك، ۇلتتىق مۋزەيدە  ۇلىستىڭ ۇلى كۇنىنە وراي بالالارعا ارنالعان ەرتەڭگىلىكتەر 14-24 -ناۋرىز ارالىعىندا وتەدى.