العاشقى كيىك ولەكسەلەرىنىڭ تابىلعانىنا بۇگىن تۋرا 10 اي. 11 -مامىردا 117 اقبوكەن ولگەنى تىركەلسە، ماۋسىمنىڭ باسىندا بۇل سان 135 مىڭعا جەتىپ توقتاعان بولاتىن. سول كەزدە كيىكتەردىڭ تولدەۋگە كەلىپ، جاپپاي قىرىلۋىنا نە سەبەپ بولعانىن اركىم وزىنشە باعامداعان- دى. تەك وكىلەتتى ورگان وكىلدەرى عانا "پاستەرەللەزدەن ءولدى" دەگەننەن تانباعان. سەنات وتىرىسىندا دەپۋتاتتار "اقبوكەننىڭ قىرعىنى" ماسەلەسىن قايتا كوتەرىپ، 1 جىل بۇرىنعى جاۋاپتى ەستىدى.
كوميتەت وتىرىسىنا استىققا قاتىستى قۇجاتتى تانىستىرۋعا كەلگەن اۋىل شارۋاشىلىعى مينيسترلىگىنىڭ وكىلدەرى دە، ەكولوگياعا بايلانىستى زاڭ جوباسىن الىپ كەلگەن ەنەرگەتيكا مينيسترلىگىنىڭ ماماندارى دا تاقىرىپتان تىس توسىن سۇراققا ءجوندى جاۋاپ ايتا المادى. سەناتور ايتاحانوۆ ونسىز دا باسىن كوتەرە الماي وتىرعان شەنەۋنىكتەرگە قوسىمشا سۇراق قويىپ، ودان سايىن تۇقىرتتى.
قۋانىش ايتاقانوۆ، ق ر پارلامەنتى سەناتىنىڭ دەپۋتاتى:
- جىل سايىن 100-200 مىڭ كيىك قىرىلادى. ال ءتول ودان تومەن. 4 جىل بولدى عوي قازىر. جىلدا قىرىلادى. تاعى دا ءبىر سۇراق، بيىلعى جىلى قىرىلا ما، قىرىلماي ما كيىك؟ سوعان جاۋاپ بەرىڭىزشى.
دەپۋتاتتىڭ بۇل ساۋالى دا جاۋاپسىز قالدى. وتىرىسقا ءتوراعالىق ەتۋشى «جازباشا تۇسىندىرمە بەرەرسىزدەر» دەپ ۇكىمەت وكىلدەرىن ىڭعايسىز جاعدايدان قۇتقارىپ جىبەردى. اۋىل شارۋاشىلىق ءمينيسترىنىڭ ورىنباسارى ساپارحان وماروۆ جيىننان شىققان سوڭ دا «كيىك قىرعىنى» تاقىرىبىنا ورالعىسى كەلمەدى.
قورشاعان ورتانى قورعاۋعا جاۋاپتى ەنەرگەتيكا ۆيتسە- ءمينيسترى دە جاۋابىن قىسقا قايىردى.
اسەت ماعاۋوۆ، ق ر ەنەرگەتيكا ءمينيسترىنىڭ ورىنباسارى:
- جۇمىس توبى جۇمىس ىستەدى عوي. سونىڭ ماتەريالدارىن قاراپ، ءبىزدىڭ مينيسترلىككە قاراستى ما، ۆەتەرينارلىق قىزمەتكە بايلانىستى ما، سول ماسەلەر بويىنشا. بىلتىرعى جۇمىس توبىنىڭ قورىتىندىسى بويىنشا قاراۋ كەرەك.
بىلتىرعى جۇمىس توبىنىڭ قورىتىندىسى دەگەنى - قىرىلعان كيىكتى جيناپ، كومۋگە كەتكەن شىعىن با؟ الدە، وسىدان 4 جىل بۇرىن اقبوكەندەردى كوبەيتۋگە باعىتتالعان عىلىمي جۇمىستارعا ءبولىنىپ، جەلگە ۇشقان 300 ميلليوننان استام قارجى ما؟ ول جاعىن ەشكىم اشىپ ايتپادى. ال بىلتىر كيىك مولاسىنداي بولعان قوستاناي، اقتوبە جانە اقمولا وبلىستارىنا بوكەندەردىڭ قۇرالايىن ورگىزۋگە قايتا كەلەرى انىق.
باقىتنۇر ءالىباي