بۇل تۋرالى بۇگىن دۇنيەجۇزى قازاقتارى قاۋىمداستىعىنان حابارلادى.
قاۋىمداستىق ءتوراعاسىنىڭ ءبىرىنشى ورىنباسارى تالعات ماماشەۆ احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ەۋرازيا عىلىمي- زەرتتەۋ ينستيتۋتىنىڭ ديرەكتورى نەۆزات شيمشەكپەن، ونىڭ ورىنباسارى ايداربەك انۋاربەك ۇلىمەن كەزدەستى.
كەزدەسۋ بارىسىندا قوس تاراپ ءوز ماقسات-مىندەتتەرىنە ساي الداعى ۋاقىتتا عىلىمي جوبالاردى بىرلەسىپ جۇزەگە اسىرۋعا ۋاعدالاستى.
بۇل شارالار ەندى الداعى ۋاقىتتا ارنايى كەلىسىمشارت نەگىزىندە جۇزەگە اسىرىلاتىن بولدى.
تالعات ماماش ۇلى قۇرمەتتى مەيمانعا دۇنيەجۇزى قازاقتارى قاۋىمداستىعى 2015 -جىلى جارىققا شىعارعان «كازاحسكايا دياسپورا ي رەپاترياتسيا (1991-2012)» عىلىمي مونوگرافياسى مەن «تۋعان ءتىل» الماناحىن تارتۋ ەتتى.
ەۋرازيا عىلىمي زەرتتەۋ ينستيتۋتى تۇركىستان قالاسىنداعى احمەت ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ الماتىداعى فيليالى بولىپ تابىلادى.
اتالعان ينستيتۋت جالپى ەۋرازيا ايماعىنا، ونىڭ ىشىندە تۇركى تىلدەس مەملەكەتتەر مەن قاۋىمداستىقتارعا قاتىستى تىڭ زەرتتەۋلەر جۇرگىزۋ جانە ستراتەگيالىق ۇسىنىستار ازىرلەۋمەن اينالىسادى.
اۆتور: گۇلميرا عوسمان-ءالي