پرەزيدەنتتىڭ باسپا ءسوز حاتشىسى: ەلباسىنىڭ ماكدونالدسقا بارۋى جاي عانا تاماقتانۋعا شاقىرۋ ەمەس، قازاقستانعا ينۆەستورلاردى تارتۋ
«كەشە پرەزيدەنت قازاقستانداعى العاشقى «ماكدونالدس» مەيرامحاناسىنا باردى. كەيبىر ادامداردى مەملەكەت باسشىسىنىڭ وندا بارۋى قازاقستاندىقتاردى فاستفۋدپەن تاماقتانۋعا شاقىرۋ بولىپ تابىلماي ما دەگەن ساۋال مازالايدى. بۇل ماسەلەنى قالاي تۇسىندىرە الاسىز؟»، دەگەن ساۋالعا: «بۇلاي ويلاۋ نەگىزسىز. تاماقتانۋ - ەڭ الدىمەن ادامنىڭ ءوز تالعامىنا بايلانىستى. «ماكدونالدستىڭ» اشىلۋى قازاقستاندىقتار كۇتكەن وقيعا ەكەنىن جوققا شىعارۋعا بولمايدى»، - دەپ جاۋاپ بەردى.
سونىمەن بىرگە، مەملەكەت باسشىسىنىڭ باسپا ءسوز حاتشىسى ەلباسىنىڭ «ماكدونالدس» مەيرامحاناسىنا بارۋىنىڭ سەبەپتەرىنە توقتالىپ ءوتتى. «بىرىنشىدەن، بولاشاقتا جەلىلەر جۇيەسى شامامەن 20 مىڭ ازاماتتى جۇمىسپەن قامتاماسىز ەتەدى. ەكىنشىدەن، «ماكدونالدس» ونىمدەرىنىڭ 70-80 پايىزى جەرگىلىكتى ونىمدەردەن جاسالادى. جانە ۇشىنشىدەن، ينۆەستورلار جاڭا نارىققا شىقپاس بۇرىن ءجيى تۇردە وندا الەمدىك برەندتەردىڭ بار بولۋىن زەرتتەيدى، جانە «ماكدونالدس» بۇل تىزىمدە سوڭعى ورىندا ەمەس. سونىڭ ارقاسىندا ولار نارىقتىڭ الەۋەتى، ازاماتتاردىڭ ساتىپ الۋ قابىلەتى جانە ءتىپتى ەلدەگى جالپى ەكونوميكالىق جاعداي تۋرالى باستاپقى كوزقاراستى قالىپتاستىرادى.
سوندىقتان كەشەگى وقيعا - بۇل پرەزيدەنتتىڭ شەتەلدىك ينۆەستورلارعا قازاقستانعا كەلىپ، مۇندا ءوز اقشاسىن سالۋعا ۇندەۋى».