شاڭحايعا «نايمان» بارا جاتىر
الماتى وبلىسى الاكول اۋدانىنىڭ ىنتالى اۋىلىندا تۋىپ-وسكەن قانداسىمىز جاستايىنان گرەك-ريم كۇرەسىمەن اينالىسىپ، سپورت شەبەرى دەڭگەيىنە دەيىن جەتتى. قازاقستان كۋبوگى جولىنداعى جارىستا قولا جۇلدەگەر اتانىپ، الماتى قالاسىنىڭ ەكى دۇركىن چەمپيونى اتاندى.
كەيىننەن ەرەجەسىز جەكپە-جەككە اڭسارى اۋىپ، «الاش پرايد» كلۋبىنىڭ ساپىندا بىرەر جىل ونەر كورسەتتى. ءبىرقاتار حالىقارالىق تۋرنيرلەردە توپ جارىپ، شەت مەملەكەتتەردە دە ءجيى جۇدىرىقتاستى. ايقاس الاڭىندا بارلىعى 14 كەزدەسۋ وتكىزگەن قۋات 10 رەت جەڭىس تويىن تويلادى.
بىلتىر «الاش پرايدتىڭ» قاتارىنان كەتكەن ول بۇل كۇندەرى ءوزى جەكە جاتتىعىپ، ءتۇرلى ءدۇبىرلى دودالارعا قاتىسۋدا. 70,3 كەلى سالماقتا كۇش سىناسىپ جۇرگەن حاميتوۆ شاڭحايدا چەمپيوندىق بەلبەۋ ءۇشىن تالاسادى. ونىڭ قارسىلاسى - ۋكراينانىڭ وكىلى اندرەي ميتروفانوۆ.
- بۇل جەكپە-جەككە مەن تىڭعىلىقتى دايارلاندىم. قىتايدا قازاقتاردىڭ قاتارى قالىڭ ەكەنى بارشاعا ءمالىم. ونىڭ ۇستىنە شاڭحايدا وقىپ جاتقان ستۋدەنتتەر دە ماعان قولداۋ كورسەتەدى دەپ ويلايمىن. ءوز كەزەگىمدە مەن كوپشىلىكتىڭ سەنىمىن اقتاپ، ايقىن جەڭىسكە قول جەتكىزۋگە تىرىسامىن. ال مەنىڭ باستى ارمانىم - UFC نەمەسە Bellator سىندى الەمگە ايگىلى نۇسقالار ۇيىمداستىراتىن جارىستاردا ونەر كورسەتىپ، قازاقتىڭ كوك بايراعىن بيىكتە جەلبىرەتۋ، - دەيدى «نايمان».
عالىم سۇلەيمەن
«ايقىن»