تارازدا ەسكى كولىكتەردەن رەزەڭكە پليتكاسى شىعارىلماق
سەرىكتەستىك باسشىسى مارال بايگەلديەۆانىڭ ايتۋىنشا، كولىك شينالارىن قايتا وڭدەپ، ودان پايدالى ءونىم شىعارۋ يدەياسى بالالاردىڭ ويىن الاڭىنىڭ قاۋىپسىز توسەمىن تابۋ قاجەتتىلىگىنەن تۋىنداعان.
«وسىنداي توسەمدى وڭدەلگەن رەزەڭكەدەن جاساۋعا بولاتىنى انىقتالدى. الايدا قازاقستاندا وعان ۇقساسى تابىلماي، بالاماسىن رەسەيدەن ىزدەۋگە تۋرا كەلدى، بۇل ەلدەن كولىك شينالارىنان جاسالعان ءتۇرلى-ءتۇستى، سەرىپپەلى، ىڭعايلى، قاۋىپسىز، جايلى جانە كوپ ۋاقىت قىزمەت ەتە الاتىن پليتكا تابىلدى. سونىمەن بىرگە وڭدەلگەن شينالاردان ءتۇرلى توسەمدەردى شىعارۋ ءبىزدىڭ ەلىمىزدە بيزنەستە كەمشىن سوعىپ جاتقانى بەلگىلى بولدى. ال تارازدا وڭدەلگەن قالدىقتاردان ءونىم شىعارۋمەن اينالىساتىن كاسىپورىندار وتە از ەكەن»، - دەيدى كاسىپكەر ايەل.
قازىرگى كەزدە «داجان» ج ش س اۆتوموبيل دوڭعالاقتارىنىڭ تىسىن رەزەڭكە ۇگىندىسىنە بولشەكتەۋ جۇزەگە اسىرىلاتىن كاسىپورىندى ىسكە قوسۋعا دايىندالۋدا. رەسەيدە شىعارىلعان جابدىقتار ساتىپ الىندى، شىعارۋشى زاۋىت اۆتوماتتى جەلىنى ورناتۋ، مونتاجداۋعا جانە قىزمەتكەرلەردى وقىتۋعا كومەكتەسەدى.
كاسىپورىن قۋاتتىلىعى ساعاتىنا 500 كەلى دوڭعالاقتاردى وڭدەي الادى.
الداعى ۋاقىتتا جامبىلدىق كاسىپورىن بالالار الاڭدارى ءۇشىن، سونداي-اق سپورتتىق قۇرىلىس ءۇشىن پايدالانىلاتىن پليتكا، رۋلون تۇرىندەگى ءتۇرلى توسەمدى ءوزى شىعارۋدى رەتكە كەلتىرمەك.
م. بايگەلديەۆا اتالعان ءوندىرىستىڭ ەكولوگيالىق قاۋىپسىزدىگىن اتاپ ءوتتى.