الماتىداعى «مەدەۋ» ايماعىندا سالىنعان زاڭسىز قۇرىلىس يەلەرىنە قاتاڭ جازا قولدانىلادى

الماتى. قازاقپارات - الماتىدا «مەدەۋ» ايماعىندا سالىنعان زاڭسىز قۇرىلىس يەلەرىنە قاتاڭ جازا قولدانىلادى.

بۇل تۋرالى قالالىق اكىمدىكتە ق ر پرەزيدەنتىنىڭ تاپسىرماسىن ورىنداۋ ماسەلەلەرىنە ارنالعان جيىندا قالا اكىمىنىڭ ورىنباسارى بولات ساۋرانبايەۆ ءمالىم ەتتى.

ونىڭ ايتۋىنشا، پاركتە جۇرگىزىلگەن مونيتورينگ بارىسىندا بەلگىلى بولعانداي 15 نىسان بار. ولاردىڭ 7 ۋىنىڭ قۇرىلىسى توقتاپ قالعان، 3 ۋى سالىنىپ جاتىر. 5 نىسان قاڭىراپ بوس تۇر.

5 نىساننىڭ يەسىندە ارنايى رۇقسات قاعازى جوق. سوندىقتان، اتالعان نىساندار سوت ارقىلى سۇرىلەتىن بولادى.

«ىلە الاتاۋى تابيعي پاركىندە 11 نىسان بار. ولاردىڭ 2 ۋىنىڭ قۇرىلىسى توقتاپ قالعان. 5 ۋى سالىنىپ جاتىر.  4 ۋى قاڭىراپ بوس تۇر. قازىر قۇرىلىس جۇمىستارىنىڭ زاڭدىلىعى تەكسەرىلىپ جاتىر. ءال-فارابيدەن جوعارى اۋماققا كەلسەك، 37 نىسان بار. ولاردىڭ 14 ى توقتاپ قالعان. 19 سالىنىپ جاتىر، 4 ۋى بوس. 11 نىساننىڭ يەسىندە رۇقسات قۇجاتى جوق. شىمبۇلاقتا ونداي نىسان جوق»، - دەدى ب. ساۋرانبايەۆ.

سونداي-اق، «گورنوە سولنسە» تۇرعىن ءۇي كەشەنىن سالىپ جاتقان كومپانيا ۇستىڭگى 2 قاباتتى سۇرۋگە كىرىستى. جاقىندا تاۋ بوكتەرىندە زاڭسىز سالىنعان مەيرامحانا ءسۇرىلدى.

بەلگىلى بولعانداي، 2014-2016 -جىلدارى الماتى قالالىق ساۋلەت جانە قۇرىلىستى باقىلاۋ باسقارماسى سوتقا جىبەرگەن ىستەر بويىنشا ءسۇرۋ تۋرالى 44 شەشىم شىققان. ولاردىڭ 7 ى عانا جۇزەگە اسقانى بەلگىلى بولدى. قالعان 37 نىسان بويىنشا ىستەر سوت اكتىسىن ورىنداۋ دەپارتامەنتىنىڭ قۇزىرىندا جاتىر.

اۆتور: گۇلميرا عوسمان-ءالي