عارىش ينفراقۇرىلىمىن پايدالانۋدىڭ قۇقىقتىق تەتىكتەرى قامتاماسىز ەتىلەدى

استانا. قازاقپارات - سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتى دامىتۋ كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عارىش قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى.

زاڭ جوباسى ارقىلى عارىش ينفراقۇرىلىمىن پايدالانۋ، عارىش قىزمەتى مەن تەحنولوگيالارىن جۇزەگە اسىرۋ تيىمدىلىگىنىڭ قۇقىقتىق تەتىكتەرىن قۇرۋعا باعىتتالادى. وسىعان بايلانىستى جەر، سۋ، ەكولوگيا جانە ورمان كودەكستەرىنە جانە قولدانىستاعى ءبىرقاتار زاڭنامالىق اكتىلەرگە وزگەرىستەر ەنگىزىلەدى. اتاپ ايتقاندا، زاڭ جوباسى ارقىلى جەر بەتىنە، ورماندارعا، سۋ نىساندارىنا مەملەكەتتىك مونيتورينگ جۇرگىزۋ بويىنشا جەردى قاشىقتىقتان زوندتاۋ مالىمەتتەرىن پايدالانۋ مۇمكىندىكتەرى قامتاماسىز ەتىلەدى. سونىمەن قاتار، مۇنداي مالىمەتتەر توتەنشە جاعدايلاردىڭ الدىن الۋ جانە جويۋ ماقساتىندا دا قامتىلادى.

بۇدان بولەك، ۇسىنىلىپ وتىرعان نورمالار بويىنشا ەسىرتكى زاتتارى مەن پسيحوتروپتىق زاتتاردىڭ زاڭسىز اينالىمىمەن كۇرەستى ۇيىمداستىرۋ ءۇشىن مەملەكەتتىك سپۋتنيكتىك گەودەزيا جەلىسىن پايدالانۋ كوزدەلىپ وتىر.

سونىمەن قاتار، «عارىش قىزمەتى تۋرالى» قولدانىستاعى زاڭعا «جەردى قاشىقتىقتان زوندتاۋ عارىش جۇيەسىنىڭ ۇلتتىق وپەراتورى»، «عارىشتىق بايلانىس جۇيەسىنىڭ ۇلتتىق وپەراتورى» ۇعىمدارىن قۇقىقتىق نەگىزدەۋگە باعىتتالعان جاڭا ءبولىم ەنگىزىلمەك. زاڭ جوباسى پالاتانىڭ الداعى ۋاقىتتا وتەتىن جالپى وتىرىسىنا شىعارىلادى.