بۇل تۋرالى Associated Press اگەنتتىگىنە سىلتەمە جاساپ لەنتا. رۋ حابارلادى.
جاڭا مەملەكەت باسشىسىن سايلاۋ پارلامەنت عيماراتىنداعى جانە ونىڭ سىرتىنداعى قارسىلىقتار جاعدايىندا ءوتتى. وپپوزيتسيونەرلەر زالدا كوزدەن جاس اعىزاتىن گاز جىبەردى، كوشەدەگى بەلسەندىلەر جارىلعىش بوتەلكەلەر لاقتىردى.
وپپوزيتسيالىق پارتيالار پارلامەنتتى داۋىس بەرۋدى توقتاتتىرۋعا تىرىستى. ولار قازىرگى ۇكىمەت، سونىڭ ىشىندە تاچي سەربيامەن كەلىسىمدەر اۋقىمىندا ولكە اۋماعىنداعى ەتنيكالىق سەرب ازشىلىعىنا ۇلكەن اۆتونوميا ۇسىنىلۋىنا جول بەردى دەپ رەنىش بىلدىرۋدە.
كوسوۆونىڭ قازىرگى پرەزيدەنتى اتيفەتا ياحياگانىڭ مانداتى 7- ساۋىردە اياقتالادى.
كوسوۆوداعى پرەزيدەنتتىڭ ءرولى نەگىزىنەن راسىمدىك سيپاتتا. وكىلەتتىك مەرزىمى بەس جىل.
تاچي كەزىندە كوسوۆونى ازات ەتۋ ارمياسىنىڭ جاساقتارىن باسقاردى، ودان كەيىن ءارتۇرلى ۇكىمەتتىك قىزمەتتەردە بولدى، سونىڭ ىشىندە پرەمەر-مينيستر قىزمەتىن اتقاردى.
2010-جىلى كوسوۆودا ادامدار اعزالارىن ساتۋمەن بايلانىستى جانجال ۋشىقتى. سول كەزدە ەۋروپا كەڭەسىنىڭ ادام قۇقىقتارى كوميتەتى 1998-1999-جىلدارداعى كوسوۆوداعى سوعىس كەزىندە كوسوۆونى ازات ەتۋ ارمياسىنىڭ مۇشەلەرى ادامدار ورگاندارىن جانە ەسىرتكى ساتۋمەن اينالىستى دەگەن بايانداما ۇسىندى. كوميتەتتىڭ مالىمەتتەرىنە سايكەس وعان ءتاچيدىڭ دە قاتىسى بار دەلىندى. كوسوۆو بيلىگى بۇل ايىپتاۋلاردى ءۇزىلدى-كەسىلدى جوققا شىعاردى.