قازاق حاندىعى تۋرالى سەريالدىڭ قاشان كورسەتىلەتىنى بەلگىلى بولدى

استانا. قازاقپارات - قازاق حاندىعى تۋرالى سەريالدىڭ قاشان كورسەتىلەتىنى بەلگىلى بولدى، - دەپ حابارلايدى «الماتى» تەلەارناسى.

جازۋشى، دراماتۋرگ سماعۇل ەلۋبايدىڭ پىكىرىنشە، قازاقتىڭ سان عاسىرلىق تاريحىن تانىتۋ كينو ارقىلى جۇزەگە اسسا، قۇبا-قۇپ. بۇل «ماڭگىلىك ەل» يدەياسىن دارىپتەۋگە سەپ بولادى. «قازاق حاندىعى فيلمى 20 ءبولىم بولىپ، دايىندىق ۇستىندە. بۇل جالپى ءبىزدىڭ كينونىڭ تاريحىنداعى ءبىرىنشى تاريحي تەلەسەريال. وسى استانا كۇنىنە وراي ونىڭ 10 ءبولىمى كورسەتىلەدى. ال، قالعان 10 سەرياسىن الداعى تاۋەلسىزدىك كۇنىنە دايىنداپ جاتىرمىز»، - دەدى جازۋشى سماعۇل ەلۋباي.

ەسكە سالايىق، قازاق مەملەكەتتىلىگىنىڭ 550 جىلدىعىن مەرەكەلەۋ اياسىندا قازاق حاندىعى تۋرالى سەريالدىڭ تۇسىرىلەتىنى حابارلانعان بولاتىن. بۇل تۋرالى 2014-جىلى قاراشا ايىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى مالىمدەگەن بولاتىن. «قازاقستان پرەزيدەنتىنىڭ تاپسىرماسىمەن قازاق حاندىعى تۋرالى 20 سەريالى فيلم تۇسىرىلەتىنىن ەرەكشە اتاپ وتكىم كەلەدى. الدىن الا دايىندىق جۇمىستارى باستالدى. سەريال 2015-جىلدىڭ قاڭتارىندا تۇسىرىلە باستايدى»، - دەدى مينيستر ورتالىق كوممۋنيكاتسيالار قىزمەتىندەگى برفيفينگتە.