بۇل تۋرالى رەسەيلىك «كوتوناۆتى» پورتالىنا سىلتەمە جاساپ abai.kz باسىلىمى جازادى.
رەسەيلىك اقپارات قۇرالدارىنىڭ جازۋىنشا، قازىرگى گولليۆۋد جۇلدىزدارىنىڭ ىشىندە ءوزىنىڭ سايقى مازاقتىعىمەن كوپ كوزىنە تانىلىپ ۇلگەرگەن اكتەر ساشا بارون (بورات) اقپان ايىندا ءوتۋى ءتيىس بولعان ماسكەۋدەگى گاسترولدىك ساپارىنان باس تارتقان.
ايتا كەتەيىك، ساشا بارون كوەن ەۋروپالىق پرومۋتەرلەردىڭ ۇسىنىسى بويىنشا تۇسىرىلگەن، ءوزى باستى ءرولدى سومدايتىن «گريمسبيلىك باۋىرلار» (براتيا يز گريمسبي) فيلمىنىڭ تۇساۋكەسەرىن وتكىزۋى ءتيىس بولعان. سونداي-اق، اتاقتى سايقى مازاقتىڭ بۇل ساپارى بارىسىندا رەسەيلىك جۇرگىزۋشى يۆان ۋرگانتتىڭ توك شوۋىنا قاتىسۋ جانە جانكۇيەرلەرمەن فوتوسەسسيا جاساۋى جوسپارلانعان. Columbia Pictures ستۋدياسىنىڭ باسشىلارى ساشا بارون كوەننىڭ بۇل شەشىمى تۋرالى تۇسىنىك بەرۋدەن باس تارتقان.
رەسەيلىك سايتتىڭ جازۋىنشا، ساشا بارون كوەن ۆيدەو حابارلاما قالدىرىپ، ماسكەۋدەگى ساپارىنان باس تارتۋعا نە سەبەپ بولعانىن تۇسىندىرگەن. سايقى مازاق ساشانىڭ حابارلاماسىندا، ماسكەۋگە كەلۋدەن باس تارتۋىنا، جەرگىلىكتى قازاق ەتنوسى وكىلدەرىنىڭ تاراپىنان جاسالعان قوقان-لوققى سەبەپ بولعاندىعى ايتىلعان.
«مەنىڭ ماسكەۋگە كەلۋىمە بىرنەشە توسقاۋىل بولىپ تۇر. جەرگىلىكتى قازاقتار مەنى ۇركىتىپ-قورقىتتى. ءتىپتى مەنىڭ قاتىسۋىممەن ماسكەۋدە وتەتىن ءبىزدىڭ باسپا ءسوز كونفەرەنتسياسىنا ونشاقتى قازاق جۋرناليستەرى قاتىسادى ەكەن.
ماعان بەلگىلى بولعانداي، ولار الدىن-الا اككرەديتاتسيادان دا وتكەن. مىنە، سول قازاق جۋرناليستەرى «بورات» فيلمى ءۇشىن مەنى تاياقتىڭ استىنا الاتىنىن ايتقان. مەن ءوزىمدى مۇنداي قاۋىپكە يتەرمەلەي المايمىن. ونىڭ ۇستىنە اشۋلى قازاقتار يۆاننىڭ (ۋرگانت) باعدارلاماسىندا دا قاستاندىق جاساۋى مۇمكىن. الەۋمەتتىك جەلىلەردە تارالعان وسى اقپاراتتار مەنىڭ رەسەيگە ساپارىمنان باس تارتۋعا جەتكىلىكتى بولدى»، - دەگەن ساشا بارون كوەن.
ەسكە سالا كەتسەك، بريتان كوميگى ساشا بارون كوەن قازاقتاردى كەمسىتىپ كورسەتەتىن «بورات» فيلمىن ءتۇسىرىپ، الەمگە تانىمال بولدى. فيلمنىڭ ۇلكەن داۋعا اينالعانىنا قاراماستان، كينو ا ق ش- تاعى «التىن گلوبۋس» جۇلدەسىن جەڭىپ العان ەدى.