استانادا «قىس ورنەگى» ءداستۇرلى شاڭعى فەستيۆالى ءوتتى - فوتو
دەپ حابارلادى astana.gov.kz.
بيىل 16- رەت وتكىزىلىپ وتىرعان شاڭعى مەرەكەسىنە 3 مىڭنان استام سالاۋاتتى ءومىر سالتى مەن بەلسەندى دەمالىستى تاڭدايتىن قالا تۇرعىندارى جينالدى، ولاردىڭ ىشىندە 2700 شاڭعى جارىسىنا قاتىسۋشىلار. كاسىپقوي سپورتشىلارمەن بىرگە اۋەسقويلار دا شاڭعى تەپتى. مەكتەپ وقۋشىلارى، سپورت مەكتەپتەرىنىڭ شاكىرتتەرى، كۇش قۇرىلىمدارىنىڭ وكىلدەرى، بالالار مەن ارداگەرلەر اراسىنداعى جارىستار بولەك ۇيىمداستىرىلدى. ادەتتەگىدەي جاپپاي جارىسقا قاتىسۋشىلاردىڭ سانى كوپ بولدى. ديستانتسيالار جاس ساناتىنا قاراي 1-3 ك م قۇرادى.
ەسىل وزەنىنىڭ بويىندا ناعىز سپورت قالاشىعى بوي كوتەردى. شاڭعى جارىسىنان باسقا، كورشى الاڭداردا تاعى دا سەگىز سپورت تۇرىنەن جارىستار وتكىزىلدى. اتاپ ايتقاندا، گىر كوتەرۋ سپورتى، ارمرەستلينگ، شاعىن فۋتبول، سۋ استىنان بالىق اۋلاۋ، ارقان تارتۋ، بەلبەۋ كۇرەسى، حوككەي جانە موتوكروسس. جەڭىمپازدار مەن جۇلدەگەرلەردى ماراپاتتاۋ شارالارى اراسىندا كونسەرتتىك باعدارلاما قويىلعان بولاتىن. ايتا كەتەيىك، بيىل قۇرىلعانىنا 25 جىل تولۋىن اتاپ وتەتىن ۇلتتىق وليمپيادا كوميتەتى شاراعا بەلسەندى قاتىستى.
«بۇگىن استانادا ناعىز قىسقى سپورتتىق مەرەكە ءوتتى. 16- رەت وتكىزىلىپ وتىرعان شاراعا ءۇش مىڭنان استام ادام قاتىسۋدا. قالا تۇرعىندارى جارىستارعا قاتىسۋ ءۇشىن بالالارمەن، وتباسىلارىمەن كەلدى»، - دەدى مادەنيەت جانە سپورت باسقارماسىنىڭ باسشىسى بەرىك مارجىقپايەۆ.
ءداستۇر بويىنشا استانا قالاسىنىڭ اكىمدىگىمەن ۇيىمداستىرىلعان فەستيۆال ەلوردادا قىسقى سپورت ماۋسىمىن جاپتى. استانادا بيىل شاڭعى ماۋسىمى اياسىندا 15 شاڭعى جارىسى وتكىزىلىپ، وعان 6 مىڭنان استام ادام قاتىسقان.