جاس ديزاينەر دەپۋتاتتاردىڭ وزىنە ەكىنشى ايەل بولۋعا ءجيى ۇسىنىس جاسايتىنىن اشىپ ايتتى
«دەپۋتاتتار وزدەرىن وتە ەرسى ۇستايدى. ەل الدىندا جۇرگەن «اعاشكالار» اسپاندا شالقايا بەرمەي، جەرگە تۇسسە ەكەن»، - دەيدى جاس ديزاينەر ايجاني نۇرلانوۆا.
قازاقستانعا «التىن ادام» وتاندىق ەرلەر كيىم ۇلگىسىن اكەلگەن جاس كاسىپكەر ايجاني ۇلكەن قىزمەتتەگى شەنەۋنىكتەردىڭ دە قالتاسىنىڭ ءارتۇرلى بولاتىنىن ايتادى. مەملەكەتتىك قىزمەتكەرلەردىڭ اراسىندا از اقشاعا قىمبات كوستيۋمدى جالىنىپ سۇرايتىندار بار بولىپ شىقتى.
«شەنەۋنىكتەردىڭ دە قالتاسى ءارتۇرلى. ولار باعاسىنا قارايدى. «ەڭ قىمباتىن كورسەتىڭىز، قىمباتىن كيگىم كەلەدى» دەيتىندەر جانە «ەڭ ارزانىن كورسەتىڭىزشى» دەپ كەلەتىندەر بار. ءتىپتى، بىرەۋلەر «60 مىڭ تەڭگەدەن جوعارى تۇراتىن كوستيۋمدى قاتتى العىم كەلىپ تۇر، ءبىراق، قالتامدا بار بولعانى 50 مىڭ تەڭگە دەپ جاتادى. وندايدا ساتۋشىلارىم بىردەن حابارلاسادى، كەلىسەمىز جەڭىلدىك جاسايمىز»، - دەيدى ايجاني نۇرلانوۆا.
تۇرمىس قۇرماعان، 25 جاستاعى جاس كاسىپكەر كەيبىر دەپۋتاتتاردان كوڭىلىنىڭ قالعانىن ايتادى. دەپۋتاتتاردىڭ ارزان پيار مەن جالعان پاتريوتتىق ارەكەتتەرى كاسىپكەردىڭ كوڭىلىن قالدىرعان.
«بىزدە دەپۋتاتتار دا ءارتۇرلى. «نەگە سونشاما ارزان؟ ءبىز قىمبات بولعانىن قالايمىز. 60 مىڭ تەڭگەنىڭ كوستيۋمىن كيگىم كەلمەيدى» دەگەن جاعدايلار بولدى. دەپۋتاتتاردىڭ كەيبىرى وزدەرىن وتە ەرسى ۇستايدى. مەن ولاردى وتانىنىڭ پاتريوتى دەپ قابىلداي المايمىن. وزدەرىنە پيار ءۇشىن عانا جۇرگەندەر بار. مەن ولاردىڭ اتىن اتاعىم كەلمەيدى. ءبىراق، وقىسا وزدەرىن تانيدى دەپ ويلايمىن. «سەنەن ون كوستيۋم الام» دەپ قول قىسىپ كەتەتىن دەپۋتاتتار دۇكەنگە كەلىپ، «انا جەرى اناداي، مىنا جەر نەگە بىلاي» دەپ ەشتەڭە المايتىندارى دا بولادى. مىندەتسىنىپ كەلەتىندەر بار. ءبىز وتاندىق ءونىمدى ۇسىنىپ وتىرمىز. ءار ادام ءوز ەلىنىڭ پاتريوتى بولا ءبىلۋ كەرەك. دەپۋتاتار اسپاننان ءتۇسۋ كەرەك»، - دەيدى ايجاني.
ايجاني وسىنداي اسپاندا شالقايعان اعالارىنىڭ «بيزنەسكە قولداۋ كورسەتەمىز» دەپ كوڭىل ءبىلدىرىپ، قىر سوڭىنان قالماي قوياتىنىن دا جاسىرعان جوق.
«شەنەۋنىكتەردىڭ اراسىندا تۇرمىسقا شىعۋعا ۇسىنىس جاسايتىندار بار. مەن ومىردە بارلىعىنا ءوز كۇشىممەن قول جەتكىزدىم. «ساعان كومەكتەسەيىن» دەپ قىلىمسىپ كەلەتىن «اعاشكالار» كوپ بولدى. مەن ەشقاشان وندايلاردىڭ كومەگىن العىم كەلمەيدى. ەگەر مەن قازىر ءبىر شەنەۋنىكپەن كەزدەسەتىن بولسام، ول ەرتەڭ مەنى دە الدايتىن بولادى. ەرتەڭ دۇكەننىڭ ءبارىن «ءوزىم جاسادىم» دەپ، كەيىن ودان ايىرىلىپ قالام با دەپ قورقىپ وتىرعىم كەلمەيدى. مەن ارتىق كەتكەندەرگە «توقتا» دەپ ايتا بىلەمىن»، - دەگەن ايجاني كەۋدەسىمەن تاۋ سوققان تالاي «اعاشكاسىنىڭ» بەتىنەن قاققانىن ايتتى.
ومىردەن ءوز ورنىن الا بىلگەن جاس كاسىپكەر ەكى جىل ىشىندە تۇرمىس قۇرعىسى كەلەتىنىن ايتادى.
«ۇسىنىس جاسايتىن جىگىتتەر كوپ. مەنى ەر ادامداردان گورى ايەلدەر كوبىرەك جاقسى كورەتىن سەكىلدى. نەگە ەكەنىن بىلمەيمىن. مەن وزىمە لايىقتى ادامدى ءالى كەزدەستىرگەن جوقپىن. قاسىمنان مىقتى ەر ادامدى كورگىم كەلەدى. وعان ارقا سۇيەگىم كەلەدى. جانە ونىڭ وزىمنەن 7-8 جاسقا ۇلكەن بولعانىن قالايمىن. 27 جاسقا دەيىن تۇرمىسقا شىققىم كەلەدى»، - دەيدى ول.
ايجاني نۇرلانوۆا ەرلەرگە ارنالعان كوستيۋم شىعاراتىن فابريكانى شىمكەنت قالاسىنان اشقان. وندا 400 دەي ادام جۇمىس جاسايدى. جاس كاسىپكەرگە پرەزيدەنتتىڭ ءوزى باستاپ، قولداۋ بىلدىرگەن بولاتىن. وتاندىق ءونىمدى پرەزيدەنت ءوزى كيگەننەن كەيىن قازاقستاندىق شەنەۋنىكتەر جاپپاي ساتىپ الىپ، ماقتانىشپەن ايتۋدى ادەتكە اينالدىرعان بولاتىن.
«وتاندىق كوستيۋم الدىم» دەپ سەلفي جاساپ، الەۋمەتتىك جەلىگە سالاتىن شەنەۋنىكتەر كوبەيدى. قاراعاندى وبلىسىنىڭ اكىمى دە «التىن ادام» فابريكاسىنان 65 مىڭ تەڭگەنىڭ كوستيۋمىن العانىن بىلەمىز.
«شەنەۋنىكتەر كوك، قوڭىر ءتۇستى، ەكى تۇيمەلى جاعاسى بۇرىشتالعان كوستيۋمدەردى سۇرايدى. ال بانك قىزمەتكەرلەرى جولاقتى، ەرەكشە ماتالاردى جاقسى كورەدى»، - دەيدى ايجاني تالعامنىڭ ءارتۇرلى بولاتىنىن ايتىپ.
2013-جىلى قازاقستان نارىعىنا شىققان «التىن ادام» فابريكاسىنىڭ دۇكەندەرىندەگى ەر ادامداردىڭ كوستيۋمدەرىنىڭ باعاسى 30 مىڭ تەڭگەدەن باستالىپ، 140 مىڭ تەڭگەگە دەيىن بارادى. وتاندىق ءونىم بۋتيكتەرىندە قاراعاندىلىق اياق كيىمدەر دە بار. فابريكانىڭ اقتوبە قالاسىندا جاڭا بۋتيگى اشىلماق. اقتوبەلىكتەر وتاندىق ءونىمدى «مادەنيەت» ساۋدا ۇيىنەن تابا الادى.
«نەگە اقتوبەدە اشۋدى قالاعانىمدى بىلمەيمىن. بۇل قالا ماعان وتە جىلى كورىندى. مەنىڭ كيىمدەرىمدى الۋ ءۇشىن استاناعا اقتوبەلىكتەر كوپتەپ كەلەدى. ولار كوبىنە قۇدالارىمىزعا سىيلىق جاسايمىز دەپ ىزدەيدى. ءبىر اقتوبەلىك قۇداسىنا ارناپ ەڭ قىمبات ءتورت كوستيۋمدى بىردەن الىپ كەتتى. قۇدالارىمىز اۋقاتتى، سوندىقتان ەڭ ادەمىسىن بەر دەپ كەلەدى. ءبىز اقتوبەدە تۇتىنۋشىلارىمىزدىڭ كوبەيەتىنىنە سەنەمىز»، - دەيدى ايجاني نۇرلانوۆا.