الماتىدا قارجىلىق پيراميدا قۇرعان ۇيىمداسقان قىلمىستىق توپ اشكەرەلەندى

الماتى. قازاقپارات- الماتى قالالىق مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنىڭ كولەڭكەلى ەكونوميكاعا قارسى كۇرەس باسقارماسىنىڭ قىزمەتكەرلەرى الاياقتىقپەن اينالىسىپ تالاي ادامدى سان سوقتىرعان، ۇيىمداسقان قىلمىستى توپتىڭ جولىن كەستى.

 بۇل توپ رەسەي ازاماتتارىنان تۇرعان.

ۆەدومستۆانىڭ رەسمي سايتاندا حابارلانعانىنداي، اتالعان قىلمىستىق توپ 2014-2015 -جىلدارى استانا مەن الماتى قالالارىندا جانە وبلىس ورتالىقتارىندا قارجىلىق پيراميدا قۇرىپ، ەكىنشى دارەجەدەگى بانكتەردەن نەسيە العان جەكە تۇلعالاردى الداۋمەن اينالىسقان. ونداعى ماقسات - كرەديت الۋشىلاردىڭ اقشاسىن يەمدەنۋ. بۇل جەردە جەكە تۇلعالار العان نەسيەلەرىنىڭ 30-دان 80 پايىزعا دەيىنگى مولشەرىن (قارىزداردى جاباتىن ۋاقىتىنا بايلانىستى) «فين ستاتۋس» جاۋاپكەرشىلىگى شەكتەۋلى سەرىكتەستىگىنە اۋدارعان جاعدايدا، بۇل فيرما ولاردىڭ نەسيەسىن جابۋعا كەپىلدىك بەرگەن.

بۇگىنگى تاڭدا ۇيىمداسقان قىلمىستىق توپتىڭ الداۋىنا تۇسكەن سالىمشىلاردىڭ سانى 700 دەن اسىپ جىعىلادى.

ال كرەديتتىك سالىمنىڭ مولشەرى 500 ميلليون تەڭگەگە جەتتى. بۇل اقشالار قىلمىستى توپتىڭ ەسەپ شوتتارىنا اۋدارىلىپ، سودان كەيىن قولما- قول اقشاعا اينالدىرىلىپ وتىرعان. قازىرگى ۋاقىتتا قارجىلىق پيراميدانى قۇرۋشىلاردىڭ نەگىزگى ۇيىمداستىرۋشىلارىنىڭ ءبىرى رەتىندە رەسەي ازاماتتارى - اعايىندى زياتدينوۆ يلدار البەرتوۆيچ پەن زياتدينوۆ روبەرت البەرتوۆيچ سوت سانكسياسىمەن قاماۋعا الىندى.

«قازىرگى ۋاقىتتا قارجىلىق پيراميداعا الدانعان سالىمشىلاردىڭ قاراجاتىن قايتارۋ جانە قىلمىستى توپتىڭ باسقا دا مۇشەلەرىن قۇرىقتاۋ ءۇشىن تەرگەۋ جۇمىستارى جۇرگىزىلىپ جاتىر. سونىمەن قاتار، الماتىدا قۇرىلعان «فين ستاتۋس» جاۋاپكەرشىلىگى شەكتەۋلى سەرىكتەستىگى جانە ونىمەن ۇلەستەس بولعان «فين ستاتۋس كونسالت»، «فين ستاتۋس ديزاين»، «فين ستاتۋس ينۆەست»، «م  ف و فين ستاتۋس زايم»، «پروفيت گرۋپپ»، «ەۆەرەست فينانس» جاۋاپكەرشىلىگى شەكتەۋلى سەرىكتەستىكتەرىنىڭ قىزمەتى دە تەكسەرىلۋدە. سوندىقتان دا اتالمىش سەرىكتەستىكتەرمەن قوسىمشا كرەديت جابۋ جونىندە كەلىسىم جاساپ، الاياقتارعا الدانعان باسقا دا سالىمشىلار بولاتىن بولسا، ءتيىستى قۇجاتتارىن اكەلۋ ارقىلى الماتى قالالىق مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنە تومەندەگى مەكەن جاي بويىنشا حابارلاسۋلارىنا بولادى: جىبەك جولى داڭعىلى، 127(سەيفۋللين كوشەسىنىڭ قيىلىسى). تەلەفون: 2792956»، - دەلىنگەن حابارلامادا.

اۆتور: جاپپاربەرگەن ايبوتا