ءا. ابدۋاليەۆ ق ر پرەزيدەنتىنە قىسقى ۋنيۆەرسيادانى ۇيىمداستىرۋ جۇمىستارى تۋرالى باياندادى

الماتى. قازاقپارات - ق ر پرەزيدەنتى ن. نازاربايەۆ الماتىداعى مۇز ايدىنى سارايىندا بولدى.

مەملەكەت باسشىسى الاتاۋ اۋدانىندا سالىنىپ جاتقان 12 مىڭ ورىندىق مۇز ايدىنى سارايىنىڭ قۇرىلىس بارىسىمەن تانىستى.

بۇل نىساندا 2017-جىلى دۇنيەجۇزىلىك قىسقى ۋنيۆەرسيادانىڭ اشىلۋ جانە جابىلۋ سالتاناتى وتەدى.

سونداي-اق، كەرلينگ پەن مانەرلەپ سىرعاناۋ جارىستارى دا جالاۋىن كوتەرەدى.

مۇز ايدىنى سارايىن ارالاۋ بارىسىندا XXVIII دۇنيەجۇزىلىك قىسقى ۋنيۆەرسيادانى وتكىزۋ مەن دايىندىق ديرەكتسياسىنىڭ باسشىسى اسەت ابدۋاليەۆ ق ر پرەزيدەنتى نۇرسۇلتان نازاربايەۆقا حالىقارالىق سپورت شاراسىنىڭ ۇيىمداستىرۋ جۇمىستارى تۋرالى باياندادى.

«قىسقى ۋنيۆەرسيادانىڭ باستالۋىنا ءبىر جىلدان از ۋاقىت قالدى. ۇيىمداستىرۋ كوميتەتى جارىسقا دايىندىقتىڭ بەلسەندى كەزەڭىنە كوشتى. وپەراتسيالىق شارالار FISU حالىقارالىق ستۋدەنتتىك سپورت فەدەراتسياسىنىڭ تالاپتارىنا سايكەس جۇرگىزىلىپ جاتىر»، - دەدى ءا. ابدۋاليەۆ.

ديرەكتسيا تاراتقان مالىمەتكە سايكەس، جارىس 8 نىساندا 12 سپورت ءتۇرى بويىنشا وتەدى. الەمنىڭ 55 ەلىنەن 2 مىڭعا جۋىق سپورتشى كەلەدى.

شەتەلدىك قاتىسۋشىلار ارنايى سالىنعان اتلەتيكالىق اۋىلدا قونىستانادى. بۇل - سايىس تاريحىنداعى سپورتشىلارعا ارنايى سالىنعان تۇڭعىش نىسان.

ۋنيۆەرسيادانىڭ وپەراتسيالىق بيۋدجەتى 2 ەسە وڭتايلاندىرىلىپ، 17 ميلليارد تەڭگەگە جەتتى. قۇرىلىس جۇمىستارىنداعى قازاقستاندىق قامتۋدىڭ ۇلەسى 50 پايىزعا جەتىپ وتىر.

سپورت جارىسىن ۇيىمداستىرۋعا 3 مىڭعا جۋىق ەرىكتىلەر تارتىلدى.

تانىستىرۋ بارىسىندا اسەت ابدۋاليەۆ 28- قاڭتاردا رەسمي سايتتا ونلاين-تىركەۋ اكسياسى باستالعانىن ءمالىم ەتتى.

وسى ۋاقىتقا دەيىن 35 ەل تىركەلدى.

اۆتور: گۇلميرا عوسمانالي