سىرتقى ىستەر جانە دەنساۋلىق ساقتاۋ مينيسترلىكتەرى ريودا سپورتشىلارىمىزدى زيكا بەزگەگىنەن قورعاۋ شارالارىن پىسىقتاۋدا
«قازاقپارات» اگەنتتىگىنىڭ رەسمي ساۋالىنا وراي ەلىمىزدىڭ باستى سپورتتىق ۆەدومستۆوسى وسىنداي جاۋاپ بەردى.
«بەلگىلى بولىپ وتىرعانداي، ءدال وسى پروبلەمامەن وليمپيادانى قابىلداۋشى تاراپ تا جۇمىستار جۇرگىزۋ ۇستىندە. دەگەنمەن، ءبىزدىڭ سپورتشىلارىمىز بەن دەلەگاتسيامىزعا قاتىستى ناقتى شارالار جايىندا قازىرگى ۋاقىتتا ايتۋعا ەرتە. سىرتقى ىستەر مينيسترلىگى مەن دەنساۋلىق ساقتاۋ جانە الەۋمەتتىك دامۋ مينيسترلىكتەرىنىڭ ۇسىنىستارى مەن شەشىمدەرىن كۇتەمىز»، - دەپ حابارلادى مينيسترلىكتەن.
ايتا كەتەرلىگى، «قازاقپارات» اگەنتتىگى ءدال وسى ساۋالمەن ق ر ۇلتتىق ەكونوميكا مينيسترلىگىنە قاراستى تۇتىنۋشىلار قۇقىعىن قورعاۋ كوميتەتى ءتوراعاسىنىڭ ورىنباسارى باس مەملەكەتتىك سانيتار دارىگەر جانداربەك بەكشينگە دە جۇگىنگەن بولاتىن.
«برازيليادا وتەتىن وليمپيادا ويىندارىنا باراتىن قازاقستان قۇراماسىنىڭ مۇشەلەرىن، ىلەسىپ بىرگە باراتىن ازاماتتاردى (جاتتىقتىرۋشىلار، دارىگەرلەر جانە ت. ب.) جانە جانكۇيلەرلەردى ساقتاندىرۋ شارالارى جەكە ازىرلەنەتىن بولادى»، - دەلىنگەن ەدى ونىڭ جاۋابىندا.
ەستەرىڭىزگە سالا كەتەيىك، دۇنيەجۇزىلىك دەنساۋلىق ساقتاۋ ۇيىمى زيكا بەزگەگىن جاھاندىق قاتەر دەپ جاريالاعان بولاتىن. ءدال وسى ۇيىمنىڭ مالىمەتتەرىنشە، زيكا بەزگەگىنە شالدىققان وڭتۇستىك جانە سولتۇستىك امەريكا ەلدەرى تۇرعىندارىنىڭ سانى 3-4 ميلليون ادامعا جەتۋى مۇمكىن. ونىڭ ىشىندە 1,5 ميلليون ادام برازيليا تۇرعىندارى بولۋى ىقتيمال.
31- جازعى وليمپيادا ويىندارى تامىزدىڭ 5-21 ءى ارالىعىندا برازيليانىڭ ريو-دە-جانەيرو قالاسىندا وتەدى.
اۆتور: مارلان جيەمباي