ا ق ش- قا لاڭكەستىك شابۋىلدار جاسالۋى مۇمكىن - ورتالىق بارلاۋ باسقارماسىنىڭ ديرەكتورى

استانا. قازاقپارات - «يسلام مەملەكەتى» (ي م) لاڭكەستىك توبىنىڭ سودىرلارى قۇراما شتاتتاردىڭ اۋماعىندا جاڭا لاڭكەستىك ارەكەتتەردى ۇيىمداستىرۋعا ارەكەتتەنۋى مۇمكىن.

  بۇل جونىندە دۇيسەنبى، 15 - اقپان كۇنى CBS تەلەارناسىنا بەرگەن سۇحباتىندا ا ق ش- تاعى ورتالىق بارلاۋ باسقارماسىنىڭ ديرەكتورى دجون برەننان مالىمدەدى، دەپ جازادى Lenta.ru.

«مەن ولار مۇندا وزدەرىنىڭ ادامدارىن، ماتەريالدارىن جىبەرۋگە ارەكەتتەنەدى دەپ ويلايمىن»، - دەپ شامالادى و ب ب- نىڭ باسشىسى. بۇدان باسقا، لاڭكەستەر ا ق ش اۋماعىندا جالدانعان ادامدارعا سەنۋى دە مۇمكىن.

«ولار مىندەتتى تۇردە تابىسقا جەتەدى دەپ ويلامايمىن»، - دەدى برەننان. لاڭكەستەر باتىس پەن مۇسىلمان الەمىنىڭ اراسىندا جانجال شىعارۋعا ارەكەتتەنىپ وتىر، دەيدى ول. برەنناننىڭ پىكىرىنشە، بۇل ي م قاتارىنا جاڭا جاقتاستاردى تارتۋ ماقساتىمەن جاسالىپ وتىر.

 و ب ب- نىڭ ديرەكتورى ارنايى قىزمەتتەردىڭ ەۋروپادا لاڭكەستىك ارەكەتتەردىڭ جولىن كەسكەنىن حابارلادى. «سوزىمە سەنسەڭىزدەر، قاۋىپسىزدىك جانە بارلاۋ قىزمەتتەرى كوپتەگەن شابۋىلداردىڭ الدىن العان»، - دەدى ول. بۇل رەتتە ورىنداۋشى كۇدىكتىلەر دە ۇستالدى، برەنناننىڭ ايتۋىنشا، ولار «يراكتان سيرياعا، ودان ەۋروپاعا كەيىن وتكەن».