رەنىشتىڭ سوڭىندا نە قالادى؟

نۇر- سۇلتان. قازاقپارات - مىنەزى جامان ءبىر جاس جىگىت بولسا كەرەك. ەشكىم ونى تۇزەي الماپتى، قاتەلىگىن ايتقان سايىن ىزالانا ءتۇسىپتى.

ءبىر كۇنى اكەسى وعان ءىشى شەگەگە تولى ءبىر جاشىك بەرىپ: «ماڭايىڭداعى دوستارىڭمەن ءار جاڭجالداسىپ قالعان سايىن تاقتايعا ءبىر- ءبىر شەگەدەن قاعىپ وتىر»، - دەپ تابىستاپتى.

العاشقى كۇنى- اق بالاسى تاقتايعا كوپ شەگە قاعىپ تاستاپتى. كەلەسى كۇندەرى دە از بولماپتى. وسى قارقىنىمەن، الگى تاقتايدى تولتىرۋعا اسا كوپ ۋاقىت جۇمساماپتى. تاقتايدىڭ تولعانىن كورگەندە اكەسى وعان: «ەندى سول دوستارىڭمەن جەكە- جەكە تاتۋلاس. ءار تاتۋلاسقان سايىن ءبىر شەگەدەن سۋىرىپ وتىر»، - دەيدى.

ءبىراز كۇندەر ءوتىپتى. ءبىر كۇنى قاراسا، قاعىلعان بار شەگە سۋىرىلىپ بىتكەن ەكەن. سوندا ونى سىرتتاي باقىلاپ جۇرگەن اكەسى بالاسىن تاقتايدىڭ الدىنا ەرتىپ اكەلىپ: «بالام، جارايسىڭ، جارادىڭ، الايدا مىنا تاقتايعا جاقسىلاپ تۇرىپ قاراشى؟ شەگەلەردى سۋىرعاندا قالىپ قويعان ورىندارىن، قارايعان كوپ تەسىكتى كورىپ تۇرسىڭ. تاقتا اۋەلگىسىندەي تازا قالپىندا، ادەمى بولىپ قالمادى. دوستارىڭمەن توبەلەسكەن سايىن ارادا جامان سوزدەر ايتىلادى. ءار رەنىش ءسوز كوڭىلدە مىنا شەگەنىڭ ورنى ءتارىزدى ءبىر- ءبىر قارا داق قالدىرىپ وتىرادى، سوندىقتان ەشكىمنىڭ كوڭلىنە كىربىڭ ۇيالاتپاعايسىڭ، بالام»، - دەگەن ەكەن ۇلىن سابىرعا شاقىرىپ، ومىرلىك ۇمىتىلماس ساباق ۇقتىرا.

instagram عيباراتتى اڭگىمەلەر پاراقشاسىنان