فۋتزال: قازاقستان قۇراماسى ءوز تاريحىندا تۇڭعىش رەت ەۋروپانىڭ قولا جۇلدەگەرى اتاندى
ويىننىڭ ءبىرىنشى تايمى كوماندالاردىڭ الما- كەزەك شابۋىلىمەن ءوتتى. چەمپيوناتتىڭ مەرگەن ويىنشىلارىنىڭ ءبىرى سەرىك جامانقۇلوۆ پەن ميحايل پەرشيننىڭ تەپكەن دوپتارى قاقپا ماڭدايشاسىنان قايتسا، سەربيالىقتاردان ۆلاديمير رازيچ العا شىعىپ كەتكەن يگيتادان دوپتى اسىرۋعا تىرىستى.
ءبىراق لەو باسپەن دوپتى دەر كەزىندە قايتارا ءبىلدى. دەگەنمەن ءبىرىنشى تايم بىتۋگە ونشاقتى سەكۋند قالعاندا، سەربيالىق قاقپاشى ميودراگ اكسەنتيەۆيچتى قاپى قالدىرعان دۋگلاس ەسەپ اشىپ، قازاقستاندى العا شىعاردى.
ەكىنشى تايم الاڭ يەلەرىنىڭ شابۋىلىمەن باستالعانىمەن، ءبىر مينۋت وتەر- وتپەستە سەرىك جامانقۇلوۆ سول قاپتالدان وسى بىرىنشىلىكتەگى التىنشى دوبىن سوعىپ، ەسەپتى 2:0-گە جەتكىزدى. مەرگەندىك جاعىنان سەرىك پورتۋگاليالىق ريكاردينومەن تەڭەستى. بۇدان كەيىن الەكساندر دوۆگان قاقپاشىمەن جەكە- دارا شىققانىمەن، ءوز مۇمكىندىگىن پايدالانا المادى.
كوپ ۇزاماي دۋگلاس وڭ قاپتالدان سۋىرىلىپ شىعىپ، تاعى دا مەرگەندىك تانىتتى. وسىدان سوڭ سەربيالىقتار قاقپاشىسىن الىپ تاستاپ، ويناۋعا كوشتى. ءبىراق ولاردىڭ بۇل تاكتيكاسى ءوزىن- ءوزى اقتامادى. دوپتى قاقشىپ العان يگيتا ءوز قاقپاسىنىڭ ماڭىنان اۋەلەتە سوعىپ، ءدال كوزدەپ، ءتورتىنشى گولدىڭ اۆتورى اتاندى. بۇدان كەيىن دۋگلاس ءوزىنىڭ وسى ويىنداعى ءۇشىنشى دوبىن سوقتى. ماتچ اياعىنا تامان سەربيالىقتار ستەفان راكيچ پەن سلوبودان رايچيەۆيچ ەسەپتى 5:2-گە دەيىن قىسقارتتى.
ءسويتىپ بىلىكتى باپكەر كاكاۋدىڭ شاكىرتتەرى ەۋروپا بىرىنشىلىگىنە تۇڭعىش رەت قاتىسقانىنا قاراماستان، ايدى اسپانعا شىعارىپ، قولا جۇلدەگەر اتاندى. اسىرەسە، ولار شيرەك فينالدا ەۋروپا چەمپيونى يتاليا قۇراماسىن جەڭىپ، سەنساسيا جاسادى.
التىن جۇلدە ءۇشىن ەۋروپانىڭ التى مارتە چەمپيونى يسپانيا مەن وسى بىرىنشىلىكتىڭ قوس دۇركىن كۇمىس جۇلدەگەرى اتانىپ ۇلگەرگەن رەسەي قۇرامالارى تالاسادى.
ەسكە سالا كەتەيىك، ەندى قازاقستاندىقتار ءوزارا باسەكەدە پولشا قۇراماسىمەن 14- قىركۇيەك - 2 - قازاندا كولۋمبيادا وتەتىن الەم چەمپيوناتىنا بەرىلەتىن جولدامانى ساراپقا سالادى. كاكاۋدىڭ شاكىرتتەرى ءبىرىنشى ويىندى 22 - ناۋرىزدا سىرت الاڭدا وتكىزسە، سودان كەيىن 12 - ساۋىردە ءوز الاڭىندا قابىلدايدى.
اۆتور: ەلجان ەرالى