قازاقستاندا دارىندى بالالارعا ارنالعان ءبىلىم وردالارى جەلىسىنە تاعى ءۇش مەكتەپ قوسىلدى
بۇل تۋرالى بۇگىن الماتىدا ق ر ب ع م «دارىن» رەسپۋبليكالىق عىلىمي-پراكتيكالىق ورتالىعى وقۋ-ادىستەمەلىك كەڭەسىنىڭ كەڭەيتىلگەن وتىرىسىندا جاريا ەتىلدى.
«وسى وتكەن قاڭتار ايىنىڭ سوڭىندا ق ر ءبىلىم جانە عىلىم ءمينيسترىنىڭ بۇيرىعىنا سايكەس، ءۇش مەكتەپ مامانداندىرىلعان ءبىلىم بەرۋ ۇيىمدارىنىڭ جەلىسىنە ەنگىزىلدى. بۇلار ەلىمىزگە بەلگىلى مەكتەپتەر: الماتى ماڭىنداعى «ارىستان» مامانداندىرىلعان ليتسەيى، استانا قالاسى اكىمدىگىنىڭ 82№ «دارىن» مامانداندىرىلعان ليتسەيى جانە اتىراۋ وبلىسى ءبىلىم باسقارماسىنىڭ «اتىراۋ وبلىسىنىڭ دارىندى بالالارعا ارنالعان جىلىوي ليتسەي- ينتەرناتى».
سوڭعىسى - اۋىل مەكتەبى، ال بۇل ءبىز ءۇشىن وتە قۋانارلىق جاعداي. الداعى ناۋرىز ايىندا وسى مەكتەپكە بارۋدى جوسپارلاپ وتىرمىز. ءبىزدىڭ جەلى جىلما-جىل بولماسا دا الداعى بەس جىل ىشىندە تاعى دا باسقا مەكتەپتەرمەن تولىعادى دەگەن سەنىمدەمىز. ويتكەنى، ءبىزدىڭ قول جەتكىزگەن جەتىستىكتەرىمىز از ەمەس»، - دەدى ءوز سوزىندە ق ر ب ع م «دارىن» رەسپۋبليكالىق عىلىمي-پراكتيكالىق ورتالىعىنىڭ پەداگوگيكالىق شەبەرلىك زەرتحاناسىنىڭ جەتەكشىسى ايگۇل قارقۇلوۆا.
ال پلەنارلىق وتىرىستا كۇن تارتىبىنە سايكەس، پەداگوگيكا سالاسىنا قاتىستى وزەكتى ماسەلەلەردى تالقىلاۋ كوزدەلگەن.
«كەڭەس وتىرىسىندا 2016-جىلعا ارنالعان جۇمىس جوسپارىن تالقىلاۋ جانە بەكىتۋ، شىعىس قازاقستان وبلىسىنىڭ «دارىن» ايماقتىق عىلىمي-پراكتيكالىق ورتالىعىنىڭ قىزمەتىمەن تانىسۋ، بەيىندىك وقىتۋ بويىنشا وقۋ جوسپارلارىن جوبالاۋ، بەيىندىك وقىتۋ، رۋحاني-ادامگەرشىلىك تاربيە بەرۋ ماسەلەلەرى تالقىلانادى»، - دەدى ءوز كەزەگىندە ش ق و سەمەي قالاسىنداعى شاكارىم اتىنداعى وبلىستىق دارىندا بالالارعا ارنالعان ءۇش تىلدە وقىتاتىن مەكتەپتىڭ ديرەكتورى الما اۋباكىروۆا.
سونىمەن قاتار، بۇگىنگى كەڭەس وتىرىسىنا جينالعاندار الماتى قالاسىنداعى سۇلتان-احمەت قوجىقوۆ اتىنداعى 39№ مامانداندىرىلعان ليتسەيدىڭ پەداگوگيكالىق ءىس-تاجىريبەسىمەن تانىسادى.
وقۋ-ادىستەمەلىك كەڭەستىڭ كەڭەيتىلگەن وتىرىسىنا ق ر ءبىلىم جانە عىلىم مينيسترلىگىنىڭ ساراپشىلارى، جوعارى وقۋ ورىندارىنىڭ عالىمدارى، ى. التىنسارين اتىنداعى ۇلتتىق ءبىلىم اكادەمياسىنىڭ وكىلدەرى، دارىندى بالالارمەن جۇمىس جونىندەگى ايماقتىق عىلىمي-پراكتيكالىق ورتالىقتاردىڭ قىزمەتكەرلەرى، مامانداندىرىلعان ءبىلىم بەرۋ ۇيىمدارىنىڭ باسشىلارى، ياعني 42 مەكتەپتىڭ ديرەكتورى مەن 38 مەكتەپ ديرەكتورلارىنىڭ وقۋ ءىسى بويىنشا ورىنباسارلارى قاتىسۋدا.
ايتا كەتەلىك، بۇگىنگى تاڭدا رەسپۋبليكادا «دارىن» رەسپۋبليكالىق عىلىمي-پراكتيكالىق ورتالىعىنا قاراستى 9 دارىندى بالالارمەن جۇمىس جونىندەگى ايماقتىق عىلىمي-پراكتيكالىق ورتالىق جۇمىس ىستەيدى. سونداي-اق، مامانداندىرىلعان ءبىلىم بەرۋ ۇيىمدارى جەلىسىنە ەنگەن مەكتەپتەردىڭ سانى - 124 كە جەتتى.
ەكى كۇنگە جوسپارلانعان وقۋ-ادىستەمەلىك كەڭەستىڭ وتىرىسى ودان ءارى جالعاسۋدا.
اۆتور: جاپپاربەرگەن ايبوتا