قازاقستانداعى شەتەلدىك جۇمىسشىلاردىڭ باسىم بولىگى - قىتايلىقتار - ۆيتسە-مينيستر

استانا. قازاقپارات - قازاقستاندا جۇمىس ىستەپ جاتقان شەتەلدىك جۇمىسشىلاردىڭ باسىم بولىگى - قىتايلىقتار.

بۇل تۋرالى بۇگىن ورتالىق كوممۋنيكاتسيالار قىزمەتىندە ق ر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ءبىرجان نۇرىمبەتوۆ ءمالىم ەتتى.

ونىڭ ايتۋىنشا، قازىرگى ۋاقىتتا ەلىمىزدە 32 مىڭنان استام شەتەل مامانى قىزمەت اتقارىپ ءجۇر.

«ءبىزدىڭ ەلدە ەكى ساياسات جۇرگىزىلەدى: ءبىرىنشىسى - ىشكى ەڭبەك نارىعىن قورعاۋ، ەكىنشىسى - قازاقستان ءبىزدىڭ باسىم جوبالارىمىزدى جۇزەگە اسىراتىن جوعارى بىلىكتى مامانداردى تارتۋ. سوندىقتان ەلىمىزدە كۆوتا مەن جۇيە ەنگىزىلگەن. بىلتىر قازاقستاندا 32 مىڭ 363 شەتەل مامانى تىركەلگەن. ولاردىڭ ىشىندە 67 پايىزى جوعارى بىلىكتى ماماندار بولسا، 32 پايىزى - بىلىكتى جۇمىسشىلار»، - دەپ اتاپ ءوتتى ول.

ونىڭ ءسوزى بويىنشا، قازاقستاندا جۇمىس ىستەپ جاتقان شەتەلدىك جۇمىسشىلاردىڭ باسىم بولىگى - قىتايلىقتار.

«شەتەلدىك مامانداردىڭ باسىم بولىگىن قىتايلىقتار قۇرايدى - 41 پايىز. شامامەن 15 پايىزى نەمەسە 5 مىڭ ادام - تۇركيا ازاماتتارى. كەلەسى 4-5 پايىزدى ۋكراينا، وزبەكستان، ءۇندىستان ەلدەرىنىڭ ازاماتتارى قۇرايدى»، - دەپ اتاپ ءوتتى ۆيتسە- مينيستر.

اۆتور: جاسۇلان جولدىبايەۆ