جيىن بارىسىندا ورالباي ابدىكارىموۆ اعىمداعى جىلدىڭ جانۋارلار الەمىن قورعاۋ مەن اڭشىلىق قۇرۋ سالاسىندا اۋقىمدى شارالار كۇتەتىنىن اتاپ ءوتتى. ونىڭ ايتۋىنشا، بيىل قاۋىمداستىق وسى باعىتتاعى زاڭنامانى جەتىلدىرۋ جۇمىسىمەن اينالىسىپ، قوعامدىق ينسپەكتورلار ينستيتۋتىن قالىپتاستىرۋدى اياقتاۋعا كۇش سالاتىن بولادى.
«ءبىز بيىلدان باستاپ قولدانىستاعى زاڭناماعا سايكەس، قاۋىمداستىقتىڭ قىزمەتى اياسىندا ەلىمىزدەگى جانۋارلار دۇنيەسىن تالداۋ مەن تىركەۋ باعىتىندا جۇمىستى جانداندىرامىز. بۇل رەتتە قوعامدىق ينسپەكتورلاردىڭ قىزمەتى اسا ماڭىزدى. سەبەبى قازىرگى كۇنى جانۋارلاردى اۋلاۋعا بەرىلەتىن ليسەنزيا مەن ولاردى تىركەۋدەگى سانى كۇدىك تۋعىزادى»، دەدى و. ابدىكارىموۆ.
ونىڭ سوزىنە قاراعاندا، الداعى ۋاقىتتا اتقارىلاتىن ماڭىزدى مىندەتتەردىڭ قاتارىندا اڭشىلىق يتتەردى تىركەۋگە قويۋ شارالارى بار. «سونىمەن بىرگە، ءبىز ۇلتتىق توبەت پەن تازىلاردىڭ شەجىرەسىن جاساپ، ولارعا ارنايى پاسپورتتار بەرۋگە دە نازار اۋداراتىن بولامىز. بۇعان دەيىن ەكى جىل قاتارىنان توبەتتەر مەن تازىلاردىڭ كورمەسى استانادا ءوتىپ كەلسە، ەندى كورمە باتىس قازاقستان، شىعىس قازاقستان، وڭتۇستىك قازاقستان وبلىستارىندا دا جالعاساتىن بولادى. استانا قالاسىندا ءساۋىر ايىندا زوولوگيا ينستيتۋتىمەن بىرلەسىپ قازاقى توبەت پەن تازىنىڭ بۇگىنگى جاي- كۇيىنە ارنالعان حالىقارالىق كونفەرەنسيا وتكىزەتىن بولامىز»، دەدى و. ابدىكارىموۆ.
اۆتور: قانات مامەتقازى ۇلى