تەسىك شەلەكتىڭ عيباراتى
ءبۇتىن شەلەكپەن سۋدى قوجايىننىڭ ۇيىنە توكپەي-شاشپاي جەتكىزسە، تەسىك شەلەككە قۇيىلعان سۋ جول بويى تامىپ، جارتىسى عانا كادەگە جارايتىن. وسىلايشا ارادا ەكى جىل سىرعىپ وتە شىعىپتى.
ءبىر كۇنى ادەتتەگىدەي وزەن جاعاسىنا تاعى بارعاندا، شىداماعان تەسىك شەلەك سۋ تاسۋشىعا قىسىلا-قىمتىرىلا: «سىزدەن كەشىرىم سۇراسام دەپ ەدىم، بىلسەڭىز ىلعي الدىڭىزدا ۇياتتان ورتەنە جازدايمىن»، - دەپتى. تاڭقالعان سۋ تاسۋشى: «نەگە؟» دەپ سۇرايدى. شەلەك: «ويتكەنى، ءتۇبىم تەسىك بولعاندىقتان، سۋدىڭ جارتىسىن عانا جەتكىزىپ، وزىمە جۇكتەلگەن مىندەتتى تولىق ورىنداي الماي جۇرگەنىمە ىشتەي قاتتى قىسىلام. مەنىڭ كەسىرىمنەن ءسىز دە تيەسىلى ەڭبەك اقىڭىزدى تولىقتاي الا الماي كەلەسىز» دەگەندە قىزمەتشى: «وعان تۇك تە قايعىرما. ودان دا قوجايىننىڭ ۇيىنە باراتىن جولدىڭ سەن جاعىنداعى گۇلدەرىنە ءبىر قاراشى»، - دەپتى جاي عانا.
شىنىندا دا قوجايىننىڭ ۇيىنە جەتكەنشە جولدىڭ ءوز جاعى جاپىراعى جايقالعان، ءيىسى اڭقىعان گۇلدەرمەن كومكەرىلىپتى. ادەمىلىكە تامسانعان شەلەك ءبىر ءسات اڭتارىلىپ تۇرىپ قالعاندا، سۋ تاسۋشى:
- جولدىڭ سەن جاعىنا ادەيىلەپ گۇلدەر ەكتىم. كۇن سايىن سۋ الىپ قايتقاندا سەن ولاردى سۋارىپ تۇردىڭ. ەكى جىلدان بەرى قوجايىندى وسىلايشا قۋانتىپ كەلدىم. ەگەر سەن تەسىك بولماعانىڭدا، گۇلدەر بولار ما ەدى؟!»، - دەگەن ەكەن.
پەندە بولعان سوڭ تەسىك شەلەك سەكىلدى اركىمنىڭ دە وزىنە ءتان كەمشىلىكتەرى بولارى ءسوزسىز. الايدا، ودان قۋىستانىپ، قورقا بەرۋ دە ءجون ەمەس. دەگەنمەن، كەمشىلىگىن تۇزەپ، ۇلگى الا بىلسە، جاقسىلىققا قاراي ۇمتىلسا، ءسىزدىڭ دە بىرەۋگە پايداڭىز تيەرى ءسوزسىز.
mazhab.kz