اقىلدىڭ ازىعى

استانا. قازاقپارات - بۇل يمام اعزام ءابۋ حانيفانىڭ باسىنان وتكەن وقيعا ەدى. حاليف ءال-مانسۇردىڭ تۇسىندا باعداتتاعى تۇرمەدە وتىرعان كەزىندە ءبىر ادام يمام اعزامدى قاتتى ۇرىپ جىبەرەدى.

سوندا سابىر، پاراساتتىلىعىمەن تانىلعان يمام اعزام الگى ادامعا بىلاي دەيدى:

- مەن دە ءدال سەنىڭ قىلىعىڭدى ءدال سەندەي ەتىپ وزىڭە قايتارا الار ەدىم. ءبىراق مەن ولاي ىستەمەيمىن. مەن سەنىڭ ۇستىڭنەن پاتشاعا شاعىم ايتسام، بالەم، جون-تەرىڭدى سىپىرار ەدى. ءبىراق مەن ولاي دا ىستەمەيمىن. سەنىڭ ماعان ىستەگەن قياناتىڭ ءۇشىن جازالا دەپ اللاعا دۇعا قايىرسام قايتەر ەدىڭ؟ ءبىراق مەن ولاي دا ىستەمەيمىن. مەن ودان دا قيامەتتىڭ كۇنىندە، اللانىڭ الدىندا تۇرعاندا اللاعا سەنىڭ ۇستىڭنەن شاعىم جاساپ، بالەم، كوزىڭە كوك شىبىندى سوندا ۇيمەلەتە الار ەدىم. ءبىراق ەگەر سول قيامەتتىڭ تاڭى تاپ قازىر اتسا جانە مەنىڭ دۇعام تاپ قازىر قابىل بولاتىن بولسا، مەن اللادان «جانناتقا كىرگىزسەڭ، وسى اداممەن بىرگە كىرگىز» دەپ تالاپ ەتەر ەدىم، - دەگەن.

(ل. تولستويدان)