امەريكالىقتار ريو وليمپياداسىنا بارماي قالۋى مۇمكىن

استانا. قازاقپارات - ا ق ش ۇلتتىق وليمپيالىق كوميتەتى ءوز ەلىنىڭ سپورت فەدەراتسيالارىنا زيكا ۆيرۋسىن جۇقتىرىپ الۋ ىقتيمالدىلىعىنان دەنساۋلىق جاعدايلارىنا الاڭدايتىن سپورتشىلار مەن قىزمەتكەرلەردىڭ بيىلعى جازدا ريو-دە-جانەيرودا وتەتىن وليمپيالىق ويىندارعا قاتىسۋدان باس تارتۋعا قۇقىقتارى بار ەكەنىن مالىمدەدى.

بۇل تۋرالى «ۆەستي. رۋ» اقپارىنا سۇيەنگەن ras.kz حابارلادى.

جەرگىلىكتى ب ا ق- تاردىڭ حابارلاۋىنشا، باس تارتۋ مۇمكىندىگى تۋرالى اقپار قاڭتار ايىنىڭ سوڭىندا امەريكا وليمپيالىق كوميتەتى مەن سپورت فەدەراتسيالارى باسشىلارى اراسىندا وتكەن كونفەرەنتسيا كەزىندە ايتىلعان. سەمسەرلەسۋ فەدەراتسياسىنىڭ پرەزيدەنتى دونالد ەنتوني ەگەر قاۋىپتەنەتىندەر بولسا، برازيلياعا بارماي، قالىپ قويۋلارىنا بولاتىنىن ايتتى.

2016-جىلعى 27- قاڭتارعا قاراي زيكا ۆيرۋسىمەن الەمنىڭ 27 ەلىنىڭ دارالانعانى بەلگىلى بولدى. ونىڭ ينفەكتسياسى وسى كەزگە دەيىن وڭتۇستىك امەريكا مەن ازيا-تىنىق مۇحيت ايماعىنداعى باربادوس، بوليۆيا، برازيليا، ۆەنەسۋەلا، كابو-ۆەردە، كولۋمبيا، ەكۆادور، سالۆادور، فيدجي، فرانسۋز گۆياناسى، گۆادەلۋپا، گۆاتەمالا، گايانا، گايتي، گوندۋراس، مالديۆ ارالدارى، مارتينيكا، مەكسيكا، جاڭا كالەدونيا، پاناما، پاراگۆاي، پۋەرتو-ريكو، سەن-مارتەن، ساموا، سولومون ارالدارى، سۋرينام مەن تايلاند ەلدەرىنە تاراپ ۇلگەرگەن.

زيكا بەزگەگى - مايمىلدار اراسىندا پايدا بولعان وتە جۇقپالى اۋرۋ. كەيدە ول ادامدارعا ماسا ارقىلى دا بەرىلەدى. مۇنى جۇقتىرىپ العان ناۋقاستاردىڭ جازىلۋلارىنا مۇمكىندىك بار. الايدا، مۇنداي ساتتىلىك جۇرتتىڭ بارىنە تيەسىلى بولا بەرمەيدى. سونىڭ ىشىندە جۇكتى ايەلدەر ءۇشىن بۇل كەسەلدىڭ قاۋپى ايرىقشا زور. ول ىشتەگى بالانىڭ ميىنا اۋىر زالالدار اكەلەدى.