تۇركيا پرەمەر- ءمينيسترى قازاقستاننىڭ مەملەكەت جانە قوعام قايراتكەرلەرىنە ءدارىس وقىدى
شارا ەلوردا تورىندەگى بەيبىتشىلىك پەن كەلىسىم سارايىندا ءوتتى.
ءدارىس بارىسىندا تۇركيا ۇكىمەت باسشىسى تاۋەلسىزدىك جىلدارى ىشىندە قازاقستان قول جەتكىزگەن جەتىستىكتەرگە، قازاقستان مەن تۇركيا اراسىنداعى ستراتەگيالىق سەرىكتەستىڭ دامۋ تاريحىنا كەڭىنەن توقتالىپ، باۋىرلاس ەكى ەل اراسىنداعى بايلانىستاردىڭ الداعى ۋاقىتتا دا نىعايا تۇسەتىندىگىنە سەنىم ءبىلدىردى.
«تاۋەلسىزدىكتەرىڭىزدىڭ 25 جىلدىعىن اتاپ وتەتىندىكتەرىڭىزگە بىزدەر وتە قۋانىشتىمىز. قازاقستان مەملەكەتى ماڭگى جاسايتىن بولادى. تۇركيا ءار ۋاقىتتا دا قازاق ەلىمەن بىرگە»، - دەدى ا. ءداۋىتوعلى.
شاراعا ق ر ۇكىمەتىنىڭ وكىلدەرى، مەملەكەتتىك ورگانداردىڭ باسشىلارى، حالىقارالىق تۇركى اكادەمياسىنىڭ وكىلدەرى، قازاقستاندا تىركەلگەن ديپلوماتيالىق ميسسيا وكىلدەرى، ەلىمىزدىڭ جوعارى وقۋ ورىندارىنىڭ رەكتورلارى، مەملەكەت جانە قوعام قايراتكەرلەرى، سونىمەن قاتار كورنەكتى عالىمدار قاتىستى.
ايتا كەتەرلىگى، تۇركيا ۇكىمەت باسشىسى احمەت ءداۋىتوعلى حالىقارالىق تۇركى اكادەمياسىنىڭ كىتاپحاناسىن دا ارنايى ارالاپ كورگەن بولاتىن.
اۆتور: مارلان جيەمباي