نيۋ-يوركتە قازاقستان تۋماسى قازاق حاندارى جايلى ءان جازدى
12:26, 06 - اقپان 2016
استانا. قازاقپارات - ا ق ش ازاماتى بەرىك قۇلمامىروۆ امەريكالىق ۆوكاليستەرمەن بىرگە ءان جيناق جازدى.
ول قازاق حاندارى كەرەي مەن جانىبەككە، دوس-مۇقاسان توبى مەن كومپوزيتور التىنبەك قورازبايەۆقا، سونىمەن قاتار، ءانشى مەيرامبەك بەسپايەۆقا ارنالدى، - دەپ حابارلايدى 24kz.
قۇلمامىروۆ ا ق ش- تا 17 جىلدان بەرى تۇرىپ كەلە جاتىر. ول الماتى مەن ماسكەۋدە ءبىلىم الىپ، ونى ارى قاراي جالعاستىرۋ ءۇشىن ا ق ش- قا كەتكەن. امەريكالىقتاردى قازاقستان مادەنيەتىمەن تانىستىرۋ ءۇشىن ول ەرەكشە جوبا جاساعان. بەرىك قازاقستان تاريحى، ەلىمىزدىڭ تانىمال جۇلدىزدارى تۋرالى اعىلشىن تىلىندە ءان جازدى. ال ءاندى امەريكالىق ەڭ ايگىلى پوپ-جۇلدىزدار ورىندادى.
«مەن قازاقستانعا تانىمال ءانشى مەيرامبەك بەسپايەۆ پەن ونىڭ ۇستازى التىنبەك قورازبايەۆتى تاڭدادىم. ونىڭ اندەرىن بۇرىن ۇنەمى تىڭدايتىنمىن»، - دەدى بەرىك قۇلمامىروۆ. ول ەندى تۋعان جەرى تۋرالى ءان جازۋدى جوسپارلاپ وتىر.